حكومهتا ههرێما كوردستانێ ئهڤرۆ بهحسا چ كر؟
گاڤ
حكومهتا ههرێما كوردستانێ كۆمبوو، ئهنجامێن كۆمبوون و سهرهدانێن ل گهل بهغدایێ بهحسكرن، سهرۆكوهزیرێ ههرێما كوردستان ژى دبیژیت: رێككهفتنا ل گهل بهغدایێ دهستكهفتنهكێ گرنگه و گاڤهكا دى یه بۆ باشتركرنا پهیوهندیێن ههردو ئالیان.
ئهڤرۆ چارشهمبێ 5-4-2023یێ حكومهتا ههرێما كوردستانی ب سهرپهرشتیا مهسروور بارزانى، سهرۆكێ جڤاتا وهزیران كۆمبوو، بهحسا ئهنجامێ سهرهدانا شاندا بلندا حكومهتا ههرێما كوردستانێ بۆ بهغدایێ و ئیمزاكرنا رێككهفتنا د ناڤبهرا حكومهتا ههرێمێ و حكومهتا فیدرال دا بۆ هنارتنا پهترۆلا ههرێما كوردستانێ كرن
د راگههاندنێ دا هاتیه، سهرۆكوهزیران ئاماژه ب رێككهفتنێ دا و گۆت: رێككهفتنا ههولێر و بهغدایێ دهستكهفتهكێ گرنگه و گاڤهكا دى یه بۆ باشتركرنا پهیوهندیێن د ناڤبهرا ههرێما كوردستانێ و حكومهتا فیدرال دا، سهرۆكوهزیرێ هەرێما کوردستانێ دهستخۆشى ل سهرۆكوهزیرێ ئیراقێ، محهمهد شیاع سوودانى كر بۆ بزاڤ و كاركرنێ ژ بۆ چارهكرنا كێشهیێن د ناڤبهرا ههرێما كوردستانێ و حكومهتا فیدرال دا.
ههروهسا سهرۆكوهزیر مەسروور بارزانی دهستخۆشى ل شاندا دانوستاندكار یا حكومهتا ههرێما كورستانێ كر كو شیای بگههیته ئهنجامهكى بێی دەستبەرداریێ ژ چ مافێن دەستووری یێن هەرێما کوردستانێ بکەت.
ههروهسا سەرۆکێ جڤاتا وەزیران دیار كر، پشتى سالێن دهربازبووى بهرپرسێن حكومهتا فیدرال مووچه و مافێن دارایى یێن ههرێما كوردستانێ بڕین، ههرێما كوردستانێ نهچار بوو پهترۆلێ رهوانهیى دهرڤه بكهت و رێكارێن هنارتنا پهترۆلێ ژى قانوونى و دهستوورى بوون و د چارچووڤەیێ مافێن دهستوورى یێن ههرێما كوردستانێ دابوون.
ههروهسا مهسروور بارزانى هیڤى خواست رێككهفتن وهك خۆ و د نێزیكترین دهم دا بهێته بجهئینان و ببیته بنهمایهكێ باش بۆ بجهئینانا قانوونا بودجهیى و ئامادهكرنا پڕۆژهقانوونا نهفت و گازێ.
راگههاندنا حكومهتێ برگا دویێ یا كۆمبوونێ ژى بهحسكریه و دیاركریه، ڤالا فهرید وهزیرا ههرێمێ بۆ كاروبارێن پهڕلهمانى و سامان بهرزنجى وهزیرێ ساخلهمیێ هندهك بابەت دهربارهى ئارمانج و پێكهات و تایبهتمهندیا پڕۆژهقانوونا وهزارهتا ساخلهمیا ههرێما كوردستانێ بهحسكرن.
ههروهسا ئاماژه ب ڤێ یهكێ ژى دا ئارمانج ژ پڕۆژهقانوونێ باشتركرن و بلندكرنا ئاستێ خزمهتگۆزاریێن ساخلهمیێ یه و چاكسازیكرنه د سیستهمێ ساخلهمیێ دا كو د بهرژهوهندا وهلاتیان دایه و رێكخستنا رێكارێن كاركرنێ یه ل كهرتێ گشتى و تایبهت و تێدا مافێن نەخۆشی هاتینە لبەرچاڤوەرگرتن.
حكومهتا ههرێما كوردستانێ دیار ژی كریه، پشتى چهندین تێبینى ل سهر پڕۆژهى هاتینه دیاركرن، بڕیار هاته دان پێداچوون د پڕۆژهقانوونێ دا بهێته کرن و د كۆمبوونا بهێت یا جڤاتا وهزیران دا بهێته پهسهندكرن.
د برگا دوماهیێ یا كۆمبوونێ دا بابهتێ بلندیا بهایێ كهلوپهلان ل بازارى هاته بهحسكرن، د ڤى وارى دا رێبهر ئهحمهد، وهزیرێ ناڤخۆ و ئۆمێد سهباح سهرۆكێ دیوانا جڤاتا وهزیران و وهزیرێن پهیوهندیدار رۆنكرن و زانیارى و راسپارده بۆ كۆنترۆلكرنا بازارى دیاركرن.