گاڤ

سه‌رۆكێ حكومه‌تا هه‌رێما كوردستانێ دیاركر كو دێ لژنه‌یه‌كا لێكۆلینێ ل دۆر رویدانا فرۆكه‌خانه‌یا سلێمانیێ هێته‌ پێكئینان.

جڤاتا وه‌زیرێن هه‌رێما كوردستانێ ئه‌ڤرۆ چارشه‌مبیێ ب سه‌رپه‌رشتیا مه‌سرور بارزانى سه‌رۆكوه‌زیرێ هه‌رێمێ كۆمبوو.

سه‌رۆكێ حكومه‌تێ ب ناڤێ جڤاتا وه‌زیران دلگرانیا خۆ ژ رویدانا هێرشا ل سه‌ر فرۆكه‌خانه‌یا سلێمانیێ ده‌ربڕى و ته‌كه‌ز كر كو حكومه‌تا هه‌رێمێ هێرشا ل سه‌ر فرۆكه‌خانه‌یێ و هه‌ر به‌شه‌كێ هه‌رێما كوردستانێ ئیدانه‌ دكه‌ت.

دیار ژى كر كو "نابیت حكومه‌تا هه‌رێمێ ئاگه‌هدارى وان لڤینێن فرۆكه‌خانه‌یا سلێمانیێ نه‌بیت یێن ل ده‌رڤه‌ى یاسایێن به‌ركار یێن هه‌رێمێ".

حكومه‌تا هه‌رێمێ بڕیار دا لژنه‌یه‌ك بۆ لێكۆلینێ و دویڤچوونا راستیان ل دۆر رویدانا فرۆكه‌خانه‌یا سلێمانیێ بهێته‌ پێكئینان.

د ته‌وه‌ره‌كێ دى یێ كۆمبوونێ دا، سه‌رۆكوه‌زیرێ هه‌رێمێ ته‌كه‌زى ل سه‌ر باشتركرنا كه‌رتێ ساخله‌میێ كر و وه‌زاره‌تا دارایى راسپارد كو بانكێن پارێزگه‌ها سلێمانیێ پابه‌ند بكه‌ت كو نه‌ختینه‌یا پێدڤى بۆ كڕینا ده‌رمانان دابین بكه‌ت.