گاڤ

سه‌رۆكێ حكومه‌تا هه‌رێما كوردستانێ هیڤى خواست رۆژنامه‌ڤان و میدیاكارێن كوردستانێ كار ژبۆ به‌رده‌وامیدان و پاراستنا ئاشتیا كۆمه‌لایه‌تى و كلتۆرێ پێكڤه‌ژیانا ئۆلى و نه‌ته‌وه‌ى بكه‌ن و گرنگیێ ب پرسێن نشتیمانى بده‌ن.

مه‌سروور بارزانى، سه‌رۆكێ حكومه‌تا هه‌رێما كوردستانێ ب هه‌لكه‌فتا رۆژا رۆژنامه‌گه‌ریا كوردى و ده‌رچوونا ئێكه‌م ژماره‌یا كوردستان ژ ئالیێ میر میقداد مه‌دحه‌ت به‌درخان و سالیادا دامه‌زراندنا سه‌ندیا رۆژنامه‌نڤێسێن كوردستانێ گه‌رمترین پیرۆزباهى ل رۆژنامه‌ڤانان و راگه‌هاندكارێن كوردستانێ كرن و هیڤیا سه‌ركه‌فتێ و به‌رده‌وامیێ بۆ خواست.

مه‌سروور بارزانى د په‌یاما خۆ دا دبێژیت: بزاڤا رۆژنامه‌گه‌رى و ئازادیا هزر و بیران و راگه‌هاندن ل هه‌رێما كوردستانێ د گه‌شه‌پێدانه‌كا به‌رده‌وام دایه‌، حكومه‌تا هه‌رێما كوردستانێ دی به‌رده‌وم بیت ل سه‌ر پشته‌ڤانیكرن ل ئازادیا راگه‌هاندنێ و ره‌خساندنا ژینگه‌هه‌كا ساخله‌م بۆ رۆژنامه‌ڤانان بۆ وێ یه‌كێ ب ئازادانه‌ و دچارچۆڤێ قانوونێن به‌ركار و ئه‌ته‌كێتین رۆژنامه‌ڤانى و پیڤه‌رێن نێڤده‌وله‌تى دا كار و ئه‌ركێ خۆ بجهـ بینن.

سه‌رۆكێ حكومه‌تێ هیڤى خواست رۆژنامه‌ڤان و میدیاكارێن كوردستانێ كار ژبۆ به‌رده‌وامیدان و پاراستنا ئاشتیا كۆمه‌لایه‌تى و كلتۆرێ پێكڤه‌ژیانا ئۆلى و نه‌ته‌وه‌ى بكه‌ن و گرنگیێ ب پرسێن نشتیمانى بده‌ن و داكۆكیێ ل ئه‌زموونا هه‌رێما كوردستانی وه‌ك قه‌واره‌یه‌كێ قانوونى و ده‌ستوورى بكه‌ن.

ئۆمێد ژى خواست ئارمانجا سه‌ره‌كى یا میدیاكارێن كوردستانێ گه‌هاندنا راستى و زانیاریێن باوه‌رپیكرى و هه‌ڤسه‌نگ بیت و و خه‌مه‌تا خه‌لك و وه‌لاتیێن هه‌رێما كوردستانێ بكه‌ت و به‌ره‌ڤانیكرن بیت ژمافێن خه‌لكێ هه‌رێما كوردستانێ و نابیت ده‌زگه‌هێن راگه‌هاندنێ ببنه‌ سه‌كۆیه‌ك بۆ به‌لاڤكرنا هزرێن توندڕێ و هاندانا توندكاریی و سڤكاتیكرن ب خه‌لك و بها و سیمبولێن نه‌ته‌وه‌یى و نشتیمانى.