دو وهلاتیێن ئیراقى ژ ئهنجامێ شهڕى ل سوودانێ گیانێ خۆ ژدهستدان
گاڤ
دو وهلاتیێن ئیراقى ژ ئهنجام شهڕ و پێكدادانێن دناڤبهرا سوپایێ سوودانێ و هێزێن پشتهڤانیا ب لهز دا گیانێ خۆ ژدهستدان.
ههر ژ 15ى ڤێ ههیڤێ، شهڕ و پهڤچوون دناڤبهرا سوپایێ سوودانێ و هێزێن پشتهڤانیا ب لهز دا دهستپێكرینه و ل گۆرهى ئامارێن رێكخراوا ساخلهمیێ یا جیهانى پتر ژ 420 كهسان تێدا گیانێ خۆ ژدهستداینه و پتر ژ 3700 كهسێن دى بریندار بووینه.
مالپهرێ ’العربی الجدید’ ژ پهرلهمانتارهكێ ئیراقى ڤهگوهاستیه؛ زهلامهكێ ئیراقى و كچا وى ژ ئهنجامێ شهڕى ل خهرتۆم گیانێ خۆ ژدهستدان.
دیار ژى كر كو ئهو ژ پارێزگهها سهلاحهدینن و بۆ چهندین سالانه ل سوودانێ دژین.
وهزارهتا دهرڤه یا ئیراقێ ژ بهرى نوكه ڤهگوهاستنا 14 ئیراقیان ژ خهرتۆمێ بۆ دهڤهرهكا ئێمن ل بورتسوودان راگههاند بوو.
ههروهسا وهزارهتا دهرڤه یا ئیراقى دوهى شهمبیێ دهرئێخستنا دپلۆماتكارێن ئیراقى ب سهركهفتیانه ژ بالیۆزخانهیا ئیراقێ ل سوودانێ راگههاند بوو.