سه‌رۆك نێچیرڤان بارزانى: ئەرکێ حکومەتا ئیراقێ یە مووچەیێن کارمەندێن حکومەتا هەرێما کوردستانێ بدەت
بەلاڤ بکە
گاڤ
سه‌رۆكێ هه‌رێما كوردستانێ راگەهاند؛ ئەرکێ حکومەتا ئیراقێ یە مووچەیێن کارمەندێن حکومەتا هەرێما کوردستانێ بدەت و پێدڤیە وی ئەرکی هەلبگریت.
سه‌رۆك نێچیرڤان بارزانى به‌رى ده‌مه‌كێ كێم راگه‌هاند؛ دو یاسا بۆ ئیراقێ گه‌له‌ك د گرنگن بۆ په‌یداكرنا سه‌قامگیریا سیاسى و ئابوورى، یا ئێكێ یاسایا بودجه‌یێ یه یا دوێ یاسایا دابه‌شكرنا داهاتایه.
ل دۆر باده‌كا په‌ترۆلا هه‌رێمێ ئاشكرا كر؛ هه‌رێم و به‌غدا ب ئێك تیم سه‌ره‌ده‌ریێ ل گه‌ل توركیا ل دۆر باده‌كا په‌ترۆلا هه‌رێمێ دكه‌ن، هنده‌ك مه‌سه‌له‌یێن ته‌كنیكى هه‌نه كو هێشتا نه‌هاتینه چاره‌كرن كو ئه‌و كێشه نینن كو ببنه رێگر و دێ چاره بن.
ل دۆر بۆمبه‌بارانكرنا ده‌ڤه‌رێن هه‌رێمێ ژ لایێ توركیا ڤه دیاركر "توركیا هنده‌ك كێشه‌یێن ئه‌منى هه‌نه و پێدڤیه حكومه‌تا ئیراقێ رۆلێ خۆ د ڤى بابه‌تى دا ببینیت چونكى ئه‌ڤه مه‌سه‌له‌یه‌كا سیادى یه و په‌یوه‌ندى ب سه‌روه‌ریا ئیراقێ ڤه هه‌یه".
گۆت ژى: نابیت گرۆپه‌كێ چه‌كدارى ژ هه‌رێمێ یان ئیراقێ بچیته توركیا كارێن چه‌كدارى بكه‌ت و بڤه‌گه‌ڕیته‌ڤه، بۆ ئیرانێ ژى وه‌سایه، پێدڤیه ئه‌گه‌رێن ڤان بۆمبه‌بارانكرنان بهێنه چاره‌كرن.
دیار ژى كر؛ مه دڤێت مه باشترین په‌یوه‌ندى ل گه‌ل وه‌لاتێن جیران هه‌بن، به‌غدا پایته‌ختێ مه‌یه و ئه‌ركێ من ئه‌وه په‌یوه‌ندیێن هه‌ولێر و به‌غدا باش بكه‌م، مه باوه‌رى ب وێ چه‌ندێ هه‌یه كو هه‌مى كێشه‌یێن هه‌ولێر و به‌غدا چاره‌سه‌ر بكه‌ین.
سه‌رۆكێ هه‌رێمێ ئاشكرا ژى كر "وه‌رگرتنا پۆستێ سه‌رۆككۆمارێ ئیراقێ د به‌رنامه‌یێ كه‌سی یێ من دا نینه".
ئاماژه دا وێ چه‌ندێ ژى كو "مه سه‌رۆكاتیا هه‌رێمێ كریه سیهوانه‌یا كۆمكرنا لایه‌نان، هه‌مى لایه‌نان شاشى كرینه و ده‌مێ راستڤه‌كرنا وان شاشیان هاتیه".
زێده ژى كر: كویراتیا ستراتیژى یا مه به‌غدایه و چاره‌كرنا ئاریشه‌یێن مه ل وێرێ یه و یا گرنگ ئه‌وه كو پێكڤه بژین د جوگرافیه‌كێ دا كو دبێژنێ ئیراق.
ل دۆر حكومه‌تا محه‌مه‌د شیاع سوودانى دیاركر؛ سوودانى دڤێت ئیراقێ به‌ره‌ڤ پێشڤه ببه‌ت و سه‌قایه‌كێ گونجاى ل ئیراقێ په‌یدا كریه.
گۆت ژى "شه‌ش هه‌یڤ ده‌مه‌كێ كێمه بۆ هه‌لسه‌نگاندنا حكومه‌تا محه‌مه‌د شیاع سوودانى".
ل دۆر ده‌ركه‌فتنا تیما ئێكه‌تیێ ژ كۆمبوونێن جڤاتا وه‌زیران دیاركر "ده‌ركه‌فتنا ئێكه‌تیێ ژ كۆمبوونێن حكومه‌تێ ب بۆچوونا من كاره‌كێ شاش بوو چونكى ئه‌و ئێك ژ پێكهێنه‌رێن سه‌ره‌كى یێن حكومه‌تێ بوو و جهێ چاره‌كرنا كێشه‌یان جڤاتا وه‌زیرانه".
زێده ژى كر: ئه‌ڤ بڕیاره نه د به‌رژه‌وه‌ندیا هه‌رێما كوردستانێ و نه یا ئیراقێ و نه یا ئێكه‌تیێ ب خۆ دا بوو.
