گاڤ

سه‌رۆكێ هه‌رێما كوردستانێ و سه‌رۆكوه‌زیرێ ئیراقێ دوپاتى ل سه‌ر ڤه‌دیتنا چاره‌سه‌ریه‌كا رهوریشالى بۆ كێشه‌یێن دناڤبه‌را هه‌ولێر و به‌غدا دا كرن.
سه‌رۆك نێچیرڤان بارزانى ئه‌ڤرۆ پێنجشه‌مبیێ ل به‌غدا ل گه‌ل محه‌مه‌د شیاع سوودانى سه‌رۆكوه‌زیرێ ئیراقێ كۆمبوو و هه‌ردو لایه‌نان ره‌وشا سیاسى و ئابوورى یا وه‌لاتى، پشته‌ڤانى ل كارنامه‌یا حكومه‌تا ئیراقێ و دابینكرنا حكومه‌تا ئیراقێ بۆ خزمه‌تگۆزاریان بۆ وه‌لاتیان به‌حسكرن.
سه‌رۆكاتیا هه‌رێما كوردستانێ به‌لاڤكریه‌؛ سه‌رۆك نێچیرڤان بارزانى و محه‌مه‌د شیاع سوودانى پێشڤه‌چوونا پرۆسێسا چاره‌كرنا كێشه‌یێن دناڤبه‌را حكومه‌تا ئیراقێ و حكومه‌تا هه‌رێما كوردستانێ دا به‌حسكرن و دیاركرن كو پێدڤیه‌ چاره‌سه‌ریه‌كا رهوریشالى بۆ بهێته‌ دیتن كو یا پشته‌ڤان بیت بۆ كارێ هه‌ڤپشك ل گۆره‌ى ده‌ستوورى و به‌رژه‌وه‌ندیا هه‌مى پێكهاته‌یێن وه‌لاتى.
ژماره‌یه‌كا پرسێن دى یێن جهێ گرنگیپێدانا هه‌ڤپشك ژ ته‌وه‌رێن دى یێن كۆمبوونێ بوون.
سه‌رۆك نێچیرڤان بارزانى ئه‌ڤرۆ ل به‌غدا پشكدارى د كۆربه‌ندێ ئیراق دا كربوو و په‌یڤه‌ك تێدا پێشكێشكربوو و تێدا دیاركربوو كو هه‌ولێر و به‌غدا وه‌ك ئێك تیم سه‌ره‌ده‌ریێ ل گه‌ل توركیا ل دۆر باده‌كا په‌ترۆلا هه‌رێمێ دكه‌ن.
هه‌روه‌سا سه‌رۆكوه‌زیرێ ئیراقێ د ده‌مه‌كێ دى دا ژ ئه‌ڤرۆ راگه‌هاند بوو كو حكومه‌تا ئیراقێ دێ د به‌لاڤكرنا مووچه‌یێن فه‌رمانبه‌رێن هه‌رێما كوردستانێ دا به‌رده‌وام بیت.