گاڤ

راپۆرته‌كا رۆژنامه‌ڤانى ئاشكرا كریه‌ كو ئیراقێ پلانه‌ك بۆ به‌رسینگگرتنا بڕیارا توركیا ل دۆر گرتنا به‌نده‌رێ جیهان ل هه‌مبه‌ر په‌ترۆلا ئیراقێ و یا هه‌رێما كوردستانێ دانایه‌.
ئیراق دێ ل هنده‌ك ده‌رگه‌هێن دى بۆ هنارتنا 400 هزار به‌رمیلێن په‌ترۆلا هه‌رێما كوردستانێ و 80 هزار به‌رمیلێن كه‌ركووكێ ب رێكا كۆمپانیا سومۆ گه‌ڕیت، ل گۆره‌ى راپۆرته‌كا مالپه‌رێ ئه‌لعه‌ره‌ب، دیار ژى كریه‌ كو به‌رپرسێن ئیراقى لێكۆلینێ ل دۆر هنده‌ك پلانان بۆ زیندیكرنا هێلێن هنارتنا په‌ترۆلێ یێن ئیراقێ ژ بۆ هه‌ر ئێك ژ سعوودیه‌، ئوردن و سووریا دكه‌ن.
ئاماژه‌ دایه‌ وێ چه‌ندێ ژى كو ئه‌گه‌ر ئه‌ڤ پلانه‌ بهێته‌ بجهئینان، دێ ئیراق به‌رهه‌مئینانا په‌ترۆلێ ژ بۆ 8 ملیۆن به‌رمیلان د رۆژه‌كێ دا ل گه‌ل هاتنا سالا 2027ێ زێده‌ كه‌ت.
زێده‌ ژى كریه‌: دروستكرن و نویژه‌نكرنا هه‌ر ئێك ژ وان هێلان پێدڤى ب كۆژمه‌یێن دناڤبه‌را 2 تا 8 ملیار دۆلارایه‌.
خۆیا ژى كریه‌ كو "ئه‌ڤ پلانه‌ وه‌ك به‌رسڤه‌كێ یه‌ ل سه‌ر ره‌شبگیریا توركیا" كو هه‌ر ژ ده‌مێ ده‌ركه‌فتنا بڕیارا ده‌سته‌یا ناڤبژیڤانیێ یا گرێداى ژوورا بازرگانى یا نێڤده‌وله‌تى ل پاریس ل 25/3/2023 هاورده‌كرنا په‌ترۆلا هه‌رێمێ راوه‌ستاندیه‌.
سه‌ره‌راى رێككه‌فتنا دناڤبه‌را حكومه‌تێ هه‌رێمێ و فیدرالى دا ل 4ى نیسانا بۆرى، تا نوكه‌ توركیا رێك نه‌دایه‌ هاورده‌كرنا په‌ترۆلا هه‌رێمێ و بڕیارا دادگه‌هێ ل دۆر پێگیریكرنا توركیا ب دانا 1.5 ملیۆن دۆلاران بۆ ئیراقێ ژ به‌ر هاورده‌كرنا وێ بۆ په‌ترۆلا هه‌رێمێ ژ سالا 2014 تا 2018 و سكالایا به‌غدا ل سه‌ر ئه‌نقه‌ره‌ ژ به‌ر وێ په‌ترۆلا ژ سالا 2018 تا نوكه‌ ژ هه‌رێمێ هاورده‌كرى، ژ ئه‌گه‌رێن ڤێ بڕیارا توركیانه‌.