سه‌رۆك نێچیرڤان بارزانى پێشوازیێ ل وه‌زیرێ ساخله‌میێ یێ ئوردنێ دكه‌ت
بەلاڤ بکە
گاڤ
سه‌رۆك نێچیرڤان بارزانى و وه‌زیرێ ساخله‌میێ یێ ئوردنێ هه‌ماهه‌نگیا دوقولى و برێڤه‌چوونا حه‌فتیا ساخله‌میێ یا كوردستانى- ئوردنى به‌حسكرن.
سه‌رۆك نێچیرڤان بارزانى ئه‌ڤرۆ دوشه‌مبیێ پێشوازى ل فیراس ئه‌لهه‌وارى وه‌زیرێ ساخله‌میا ئوردنێ و شانده‌كێ ل گه‌ل دا كر.
سه‌رۆكاتیا هه‌رێمێ به‌لاڤكریه؛ د دیداره‌كێ دا كو وه‌زیرێن ساخله‌میێ یێن حكومه‌تا فیدرالى و حكومه‌تا هه‌رێما كوردستانێ تێدا به‌رهه‌ڤ ببوون، به‌حس ل رێكخستنا حه‌فتیا ساخله‌میێ یا كوردستانى- ئوردنى هاته كرن كو د نوكه دا ل هه‌ولێرێ برێڤه‌دچیت.
سه‌رۆك نێچیرڤان بارزانى سوپاسیا هاریكارى و هه‌ماهه‌نگیا دناڤبه‌را وه‌زاره‌تا ساخله‌میێ یا ئوردنێ ل گه‌ل وه‌زاره‌تا ساخله‌میێ یا هه‌رێما كوردستانێ و یا حكومه‌تا فیدرالى دا كر و دوپاتكر كو هه‌رێما كوردستانێ و ئیراق دشێن د هه‌ردو بوارێن پزیشكى و په‌روه‌رده‌یى دا مفاى ژ ئه‌زموونا سه‌ركه‌فتى یا ئوردنێ وه‌ربگرن.
د راگه‌هاندنێ دا هاتیه ژى؛ پێشڤه‌برنا په‌یوه‌ندیێن ئوردنێ ل گه‌ل ئیراقێ و هه‌رێما كوردستانێ و هاریكاری و هه‌ماهه‌نگیا پتر د بوارێن ساخله‌میێ و پزیشكى دا دناڤبه‌را هه‌ردو لایان دا ژ ته‌وه‌رێن دى یێن دیدارى بوون.
