گاڤ

حكومه‌تا هه‌رێما كوردستانێ داخواز ژ حكومه‌تا فیدرالى كر كو میكانیزمه‌كا ژ هه‌ژى بۆ خه‌رجكرنا شایسته‌یێن هه‌رێمێ بهێته‌ دانان و جیاكارى ل دژى هه‌رێما كوردستانێ نه‌هێته‌ كرن هه‌روه‌سا كێشه‌یا جۆتیارێن كورد ل كه‌ركووكێ بهێته‌ چاره‌كرن.
جڤاتا وه‌زیرێن هه‌رێما كوردستانێ ئه‌ڤرۆ چارشه‌مبیێ ب سه‌رپه‌رشتیا مه‌سرور بارزانى سه‌رۆكێ حكومه‌تێ و قوباد تاله‌بانى جێگرێ سه‌رۆكێ حكومه‌تێ كۆمبوو و بابه‌تێ بودجه‌یا ئیراقێ ته‌وه‌رێ سه‌ره‌كى یێ كۆمبوونێ بوو.
د به‌یانه‌كا سه‌رۆكاتیا جڤاتا وه‌زیران دا هاتیه‌؛ سه‌رۆكوه‌زیرێ هه‌رێمێ ئاماژه‌ دا پێشهاتێن په‌یوه‌ندیدار ب په‌سه‌ندكرنا بودجه‌یا ئیراقێ و ده‌رئه‌نجامێن وێ ل سه‌ر هه‌رێما كوردستانێ.
تێدا هاتیه‌ ژى؛ سه‌رۆكێ حكومه‌تێ ئاماژه‌ ب وێ چه‌ندێ كر كو هه‌رێما كوردستانێ هه‌مى ئه‌رك و به‌رپرسیاریێن خۆ د چارچووڤه‌یێ ده‌ستوورى و رێككه‌فتنێن هاتینه‌ ئیمزاكرن دا بجهئیناینه‌، لێ ژ ده‌رڤه‌ى ده‌ستوورى و رێككه‌فتنان ده‌ستكارى د بابه‌تێن په‌یوه‌ندیدار ب ماف و شایسته‌یێن دارایى دا هاتیه‌ كرن كو ژ روویێ ده‌ستوورى ڤه‌ گوهۆڕینا رێككه‌فتنا هه‌ڤپشك دناڤبه‌را حكومه‌تا فیدرالى و حكومه‌تا هه‌رێمێ دا یا رێكپێداى نینه‌.
جڤاتا وه‌زیران داخواز ژ حكومه‌تا فیدرالى كر كو د ده‌مێ بجهئینانا بڕگه‌ و مادده‌یێن بودجه‌ى دا هه‌روه‌كى سه‌رۆكوه‌زیرێ ئیراقێ سۆز داى، پێداچوونێ د بڕگه‌ و مادده‌یێن هه‌مواركرى دا بكه‌ت كا تا چ رادده‌ ل گه‌ل كارنامه‌یا حكومه‌تا فیدرالى د گونجن و تا چه‌ند ژ هه‌ژى بجهئینانێ نه‌.
هه‌روه‌سا حكومه‌تا هه‌رێمێ داخواز كر كو میكانیزمه‌كا ژ هه‌ژى ژ بۆ خه‌رجكرنا شایسته‌یێن هه‌رێما كوردستانێ بهێته‌ دانان و هه‌ر رێكاره‌كا جیاكارى ل دژى هه‌رێما كوردستانێ ره‌تكر.
به‌یانێ دیار ژى كریه‌ "ئه‌ركه‌ ل سه‌ر حكومه‌تا فیدرالى یاسایا بودجه‌یێ ب جهـ بینیت و شایسته‌یێن دارایى یێن هه‌رێما كوردستانێ خه‌رج بكه‌ت، ژ به‌رى هه‌میان ژى خه‌رجیێن هه‌یڤانه‌ یێن مووچه‌یێن مووچه‌خۆر، فه‌رمانبه‌ر و خانه‌نشینێن هه‌رێمێ و هێزێن پێشمه‌رگه‌ى ل گۆره‌ى وان ژماره‌یێن د خشته‌یێن بودجه‌ى دا هاتینه‌ جێگیركرن".
د بڕگه‌یا دوێ دا كو ژ لایێ ڤالا فه‌رید وه‌زیرا هه‌رێمێ بۆ كاروبارێن په‌رله‌مانى ڤه‌ هاته‌ پێشكێشكرن، دانوستاندن ل دۆر ره‌شنڤیسا وان پرۆژه‌یاسایان و په‌یره‌وان هاته‌ كرن كو تا نوكه‌ د كۆمبوونێن جڤاتا وه‌زیران دا ده‌نگدانا دویماهیێ ل سه‌ر نه‌هاتیه‌ كرن.
هه‌روه‌سا د بڕگه‌یا سیێ دا، دانوستاندن ل دۆر كاراكرنا لژنه‌یا بجهئینانا مادده‌یا 140 یا ده‌ستوورى و بجهئینانا بڕیارا ژماره‌ 29 یا سالا 2012 یا تایبه‌ت ب هه‌لوه‌شاندنا بڕیارێن (لژنه‌یا كاروبارێن باكۆر- لجنة شؤون الشمال) یا هه‌لوه‌شیاى یا تایبه‌ت ب ئه‌ردێن چاندنێ یێن كه‌ركووكێ هاته‌ كرن.
جڤاتا وه‌زیران لژنه‌یا وه‌زارى یا تایبه‌ت ب سه‌رۆكاتیا وه‌زیرێ ناڤخۆ ژ بۆ دویڤچوونا بجهئینانا مادده‌یا 140 ژ ده‌ستوورى راسپارد كو كۆمبوونێن پێدڤى ئه‌نجامبده‌ت و دویڤچوونه‌كا ب له‌ز بكه‌ن بۆ بجهئینانا بڕیارێن جڤاتا وه‌زیرێن ئیراقێ و لژنه‌یا فیدرالى یا تایبه‌ت ب بجهئینانا مادده‌یا 140 و ب تایبه‌ت یێن گرێداى كێشه‌یا ئه‌ردێن جۆتیارێن كورد و توركمان ل كه‌ركووكێ كو رێگری لێ دهێته‌ كرن.
د بڕگه‌یا چارێ ژى دا ژ كۆمبوونێ به‌حس ل نه‌خۆشیا تایا خوینبه‌ربوونێ و رێكارێن خۆپاراستنێ ژێ هاته‌ كرن و تێدا هه‌ر ئێك ژ د. سامان به‌رزنجى وه‌زیرێ ساخله‌میێ و دارا ره‌شید وه‌زیرێ چاندن و ژێده‌رێن ئاڤێ ب وه‌كاله‌ت راپۆرتێن خۆ پێشكێشكرن.