سه‌رۆك نێچیرڤان بارزانى: مه دیداره‌كا باش ل گه‌ل شیره‌تكارێ ئه‌لمانیا هه‌بوو
بەلاڤ بکە
گاڤ
كۆمبوونا سه‌رۆكێ هه‌رێما كوردستانێ و شيره‌تكارى ئه‌لمانيا ل به‌رلینێ ب دویماهیك هات و سه‌رۆكێ هه‌رێمێ راگه‌هاند كو كۆمبوونه‌كا باش بوو.
كۆمبوونا سه‌رۆك نێچيرڤان بارزانى د چارچووڤه‌يێ سه‌ره‌دانا وى دا بۆ ئه‌لمانيا ل گه‌ل ئۆلاف شۆلتز شيره‌تكارێ ئه‌لمانيا ل به‌رلينێ ئه‌ڤرۆ ئێڤارى ب دویماهیك هات و سه‌رۆكێ هه‌رێمێ گرنگترین خالێن كۆمبوونێ ئاشكرا كرن.
سه‌رۆك نێچیرڤان بارزانى راگه‌هاند؛ مه دیداره‌كا باش ل گه‌ل شیره‌تكارێ ئه‌لمانیا هه‌بوو.
خۆیا ژى كر؛ د دیدارێ دا ئه‌و بابه‌تێن جهێ گرنگپێدانا هه‌ڤپشك دناڤبه‌را هه‌رێمێ و ئه‌لمانیا دا هاتنه به‌حسكرن، هه‌روه‌سا په‌یوه‌ندیێن ئیراقێ و ئه‌لمانیا ژى هاتنه به‌حسكرن.
سه‌رۆكێ هه‌رێمێ دیار ژى كر كو ئه‌لمانیا گه‌له‌ك گرنگیێ ب پێشڤه‌برنا په‌یوه‌ندیان ل گه‌ل هه‌رێما كوردستانێ و ئیراقێ دده‌ت.
گۆت ژى "چه‌وانیا پێشڤه‌برنا په‌یوه‌ندیێن مه ل گه‌ل ئه‌لمانیا ژ روویێن سیاسى و ئابوورى ڤه مه به‌حسكر هه‌روه‌سا مه داخواز ژ شیره‌تكارى ئه‌لمانیا كر سه‌ره‌دانا هه‌رێما كوردستانێ و ئیراقێ بكه‌ت".
ئاماژه دا وێ چه‌ندێ ژى كو سه‌رۆكاتیا هه‌رێمێ به‌رى ڤێ سه‌ره‌دانێ هه‌ماهه‌نگی ل گه‌ل محه‌مه‌د شیاع سوودانى سه‌رۆكوه‌زیرێ ئیراقێ كریه.
سه‌باره‌ت په‌یوه‌ندیێن پارتى و ئێكه‌تیێ گۆت: په‌یوه‌ندیێن پارتى و ئێكه‌تیێ د خرابن، لێ نه گه‌له‌ك، ئه‌ڤرۆ ژى كۆمبوونا مه‌كته‌بێن سیاسى یێن هه‌ردو پارتان هاته كرن، هیڤى دكه‌ین ئه‌ڤ كۆمبوونه د به‌رده‌وام بن دا كو بگه‌هینه ئه‌نجامه‌كێ.
سه‌رۆكێ هه‌رێمێ ئاماژه دا وێ چه‌ندێ ژى كو "ئه‌گه‌ر ئه‌م ل گه‌ل ئێكتر بین دێ پێگه‌هێ هه‌رێما كوردستانێ ل ده‌رڤه و ئیراقێ ژى ب هێز كه‌ڤیت و هه‌مى بزاڤ بۆ وێ چه‌ندێ نه ل گه‌ل ئێكه‌تیێ بگه‌هینه لێكتێگه‌هشتنێ".
ل دۆر بابه‌تێ په‌ترۆلا هه‌رێمێ خۆیا كر "هنارتنا په‌ترۆلا هه‌رێمێ پشكه‌كا وێ په‌یوه‌ندى ب ئیراقێ ڤه و پشكه‌كا دى ب توركیا ڤه هه‌یه، لێ تا نوكه ل به‌غدا ژى گاڤێن پێدڤى بۆ دوباره ده‌ستپێكرنا هنارتنا په‌ترۆلێ نه‌هاتینه هاڤێتن".
گۆت ژى؛ مه د كۆمبوونێ دا سوپاسیا ئه‌لمانیا كر چونكى د ده‌مێن سه‌خت دا د بوارێن مرۆڤایه‌تى، ئابوورى و سه‌ربازى دا هاریكاریا هه‌رێمێ كریه و ئه‌لمانیا دوپاتكر كو دێ ژ هه‌مى لایان ڤه د پشته‌ڤانیا هه‌رێما كوردستانێ و ئیراقێ دا به‌رده‌وام بیت.
دیار ژى كر؛ مه و شیره‌تكارێ ئه‌لمانیا ته‌كه‌ز ل سه‌ر وێ چه‌ندێ كر كو داعش وه‌ك مه‌ترسیه‌ك هێشتا مایه و تا نوكه ئیراقێ پێدڤى ب پشته‌ڤانیا نێڤده‌وله‌تى هه‌یه.
سه‌رۆك نێچيرڤان بارزانى هه‌ر د ئه‌ڤرۆ دا د چارچووڤه‌يێ سه‌ره‌دانێ دا بۆ ئه‌لمانيا، ژماره‌يه‌كا كۆمبوونان ل گه‌ل به‌رپرسێن بلند يێن ئه‌لمانى ئه‌نجامدابوون و ل گه‌ل هه‌ر ئێك ژ فرانسيسكا برانتنه‌ر سكرتێرا ده‌وله‌تێ ل وه‌زاره‌تا ئابوورى يا ئه‌لمانيا، تۆبياس ليندنه‌ر وه‌زيرێ ده‌وله‌تێ يێ ئه‌لمانيا بۆ كاروبارێن ده‌رڤه و سڤينيا شۆلتز وه‌زيرا هاريكاريا ئابوورى و گه‌شه‌پێدانا ئه‌لمانيا كۆمببوو.
د وان كۆمبوونان دا، پێشڤه‌برنا په‌يوه‌نديێن هه‌رێما كوردستانێ و ئه‌لمانيا، هاريكاريێن ئه‌لمانيا بۆ هه‌رێمێ، ره‌وشا ئيراقێ و هه‌رێما كوردستانێ و ده‌ڤه‌رێ و ژماره‌يه‌كا ته‌وه‌رێن جهێ گرنگپيپێدانا هه‌ڤپشك هاتبوونه به‌حسكرن.
