سه‌رۆك بارزانى پێشوازیێ ل سه‌رۆكێ كه‌نیسه‌یا كلدانى ل ئیراقێ و جیهانێ دكه‌ت
بەلاڤ بکە
گاڤ
سه‌رۆك بارزانى و سه‌رۆكێ كه‌نیسه‌یا كلدانى ل ئیراقێ و جیهانێ ره‌وشا پێكڤه‌ژیانێ ل هه‌رێمێ به‌حسكرن.
سه‌رۆك بارزانى ئه‌ڤرۆ ئێكشه‌مبیێ ل سه‌لاحه‌دین پێشوازى ل كاردینال لویس ساكۆ پارتیارك و سه‌رۆكێ كه‌نیسه‌یا كلدانى ل ئیراقێ و جیهانێ و شانده‌كێ ل گه‌ل دا كر كو ژ ژماره‌یه‌كا مه‌ترانێن ئایینێ كریستیانان ل هه‌رێما كوردستانێ و ئیراقێ پێكهاتبوو.
د به‌یانه‌كا باره‌گایێ بارزانى دا هاتیه؛ كاردینال لویس ساكۆ سوپاسیا وێ رێزگرتنێ كر یا ل هه‌رێما كوردستانێ بۆ هێما و كه‌سایه‌تیێن ئایینێن جودا جودا هه‌ى هه‌روه‌سا ده‌ستخۆشى ل سه‌رۆك بارزانى ژى كر ژ به‌ر رۆلێ وى د پێكڤه‌ژیانێ و ژیانا هه‌ڤپشك یا پێكهاته‌یان دا.
تێدا هاتیه ژى "كاردینال لویس ساكۆ بڕیارا ڤێ دویماهیێ یا سه‌رۆككۆمارێ ئیراقێ ب ڤه‌كێشانا مه‌رسوومێ سه‌رۆككۆماریێ یێ تایبه‌ت ب كه‌نیسه‌یا كلدانى ب بڕیاره‌ك نه‌دروست و مه‌ترسیدار لقه‌له‌مدا".
سه‌رۆك بارزانى بۆ وى شاندى دیاركر كو هه‌رێما كوردستانێ جهێ پێكڤه‌ژیانێ و ئاشتبوونێ یه و خۆیا ژى كر "د شه‌ڕێ دژى تیرۆرستێن داعش دا، من گۆته شانده‌كێ زه‌لامێن ئایینى یێن كریستیان كو كوردستان وه‌لاتێ هه‌وه‌یه و نابیت هزر د ب جهـ هێلانا وێ دا بكه‌ن".
سه‌رۆك بارزانى نیگه‌رانیا خۆ ل دۆر بڕیارا سه‌رۆككۆمارێ ئیراقێ ب ڤه‌كێشانا مه‌رسوومێ سه‌رۆككۆماریێ یێ تایبه‌ت ب كه‌نیسه‌یا كلدانى ده‌ربڕى و هیڤى خواست پێداچوون د وێ بڕیارێ دا بهێته كرن.
د پشكه‌كا دى یا دیدارێ دا، شاندێ مێهڤان كورتیه‌ك ل دۆر ره‌وشا پارێزگه‌ها نه‌ینه‌وا و ژیانا كریستیانان بۆ سه‌رۆك بارزانى به‌حسكر.
ل حەفتیا بووری مەرسووما سەرۆککۆماری ژ كاردینال لویس ساكۆ پارتیارك و سه‌رۆكێ كه‌نیسه‌یا كلدانى ل ئیراقێ و جیهانێ هاتبوو ڤەکێشان و ڤێ یەکێ نەرازیبوونێن مەزن دویڤ خۆ دا ئینان و لویس ساكۆ بەرەڤ هەرێما کوردستانێ ڤە هات.
