گاڤ

حكومه‌تا هه‌رێما كوردستانێ راگه‌هاند، پرسا مووچه‌یى گرنگترین بابه‌ته‌ و ئه‌وله‌ویه‌ت بوویه‌ ژ ئالیێ حكومه‌تا هه‌رێما كوردستانێ هه‌تا وێ رۆژێ پشت ب داهاتێ ناڤخۆ و په‌ترۆلێ دبه‌ست بۆ هاتیه‌ دابینكرن و حكومه‌تا هه‌رێمێ كه‌متر خه‌م نه‌بوویه‌ و هه‌موو مه‌هان مووچه‌یێ ته‌مام یێ وه‌لاتیان دهاته‌ دابینكرن.

پێشه‌وا هه‌ورامانى، په‌یڤدارێ حكومه‌تا هه‌رێما كوردستانێ گۆت: نوكه‌ كو داهات ب ریككه‌فتنه‌كێ ل گه‌ل حكومه‌تا ئیراقێ د ده‌ست هه‌رێما كوردستانێ دا نه‌مایه‌، حكومه‌تا ئیراقێ به‌رپرسه‌ همبه‌رى دابینكرنا مووچه‌ و مافێن دارایى یێن وه‌لاتیێن هه‌رێما كوردستانێ ل گۆره‌یى قانوونێ، دڤى وارى دا هه‌موو ئه‌ركێ ل سه‌ر ملێ حكومه‌تا هه‌رێمێ هاتینه‌ بجهئیان و پابه‌ندیا ته‌مام یا قانوونى بجهئینایه‌ و تا ئه‌ڤرۆ ژى سه‌رۆكوه‌زیرێن هه‌ریمێ د په‌یوه‌ندیێ دایه‌ بۆ وێ یه‌كێ حكومه‌‌تا ئیراقێ هه‌ر چ زوویه‌ مووچه‌یێ مووچه‌خۆرێن هه‌رێمێ ب هنێریت و زێده‌تر ژ ڤێ یه‌كێ پاش ناكه‌ڤیت.

هه‌روه‌سا دیاركر، په‌یاما وان بۆ پشكه‌ك ژ ئالیێن سیاسى و خه‌لكى ئه‌وه‌ د هه‌یاما چه‌ند سالان بێ چ جۆران گوهداری ب پێگه‌هێ قانوونى و ده‌ستوورى یێ هه‌رێما كوردستانێ، وه‌ك وه‌لاتیێن خه‌مخۆرێن خه‌لكێ كوردستانێ ره‌فتار نه‌كرینه‌، ژڤێ یه‌كێ زێده‌تر ل پێگه‌هێ هه‌رێما كوردستانێ نه‌ده‌ن و بۆ جاره‌كێ ژى بیت به‌رپرسیارانه‌ همبه‌رى خه‌لكێ كوردستانێ و مافێن وان یێن ده‌ستوورى بلڤن و مامه‌لێ بكه‌ن و ئه‌ڤێ پرسێ په‌یوه‌ندیێن راسته‌وخۆ ب ژین و ژیارا خه‌لكى ڤه‌ هه‌یه‌ و بابه‌تێ موزایده‌ و بانگه‌شیا هه‌لبژارتنان نینه‌ و پێدڤیه‌ نه‌بیته‌ ئامرازه‌ك بۆ لێدان ل پێگه‌هێ قانوونى و ده‌ستوورى یێ كوردستانێ.