گاڤ

تۆڕه‌كا ئه‌مریكى ئاشكرا كریه‌ كو داخوازكه‌رێن گشتى ئاراسته‌كرنا هنده‌ك تۆمه‌تێن نوى بۆ دۆنالد ترامپ سه‌رۆكێ به‌رێ یێ ئه‌مریكا بۆ ستافێ پارێزه‌رێن وى راگه‌هاندینه‌.
ئه‌ڤ رویدانه‌ هات ل ده‌مه‌كێ ژماره‌یه‌كا رۆژنامه‌ڤانان ژ ده‌رڤه‌ى ئاڤاهیێ دادگه‌هێ ل واشنتۆن خڕڤه‌بوون و دهێته‌ چاڤه‌رێكرن ده‌سته‌یا مه‌زن یا سوندخواریان هنده‌ك تۆمه‌تێن دی ب فه‌رمى ئاراسته‌ى ترامپى ژ به‌ر بسه‌رداگرتنا لایه‌نگرێن وێ بۆ ئاڤاهیێ كاپیتۆلێ ل 6/1/2021 ژ به‌ر سه‌رنه‌كه‌فتنا وى د هه‌لبژارتنێن سه‌رۆكاتیا ئه‌مریكا دا بكه‌ت.
تۆڕا NBC ژ ژماره‌یه‌كا ژێده‌ران ڤه‌گوهاستیه‌؛ هه‌ردو پارێزه‌رێن ترامپى تود بلانش و جون لاورۆ دیداره‌ك ل گه‌ل داخواكه‌رێن گشتى ل ئۆفیسا شیره‌تكارێ تایبه‌ت جاك سمێس ئه‌نجامداینه‌، تێدا ب پارێزه‌رێن ترامپى هاتیه‌ راگه‌هاندن كو پێشبینیا ئاراسته‌كرنا هنده‌ك تۆمه‌تێن نوى بۆ ترامپى بكه‌ن.
وێ تۆڕێ د راپۆرتا خۆ دا ئاماژه‌ نه‌دایه‌ سرۆشت و جۆرێ تۆمه‌تێن نوى یێن چاڤه‌رێیه‌ ئاراسته‌ى ترامپى بهێنه‌ كرن.
د رویدانا هێرشكرنا لایه‌نگرێن ترامپى ل ده‌ستپێكا سالا 2021 بۆ سه‌ر ئاڤاهیێ كاپیتۆل دا، كارێ كۆنگرێسێ ئه‌مریكى بۆ ده‌مێ چه‌ند ده‌مژمێران راوه‌ستیابوو، هه‌روه‌سا خۆنیشانده‌ره‌ك و پۆلیسه‌ك زێده‌بارى سێ كه‌سێن دى گیانێ خۆ ژده‌ستدابوون.
پشتى خۆنیشانده‌ر ل وى ده‌مى ژ كاپیتۆل هاتینه‌ ده‌رئێخستن، كۆنگرێسى سه‌ركه‌فتنا جۆ بایدن د هه‌لبژارتنێن سه‌رۆكاتیێ دا په‌سه‌ند كربوو و ل دویڤ دا ده‌زگه‌هێن ئه‌منى یێن ئه‌مریكى ب سه‌دان لایه‌نگرێن ترامپى ده‌سته‌سه‌ركربوون.
ترامپ هه‌روه‌سا د د ده‌مه‌كێ دى دا ژ ئه‌ڤ ساله‌ ل سه‌ر ب ده‌هان كه‌یسێن نه‌گرێداى كاپیتۆلێ ل هه‌مبه‌ر دادگه‌هێن فیدرالى به‌رهه‌ڤببوو.