سه‌رۆك بارزانى بۆ خێزانێن شه‌هیدان: یا د دلێ هه‌وه دا ب ئاشكرایى بێژن
بەلاڤ بکە
گاڤ
ئه‌ڤرۆ سه‌رۆك بارزانى ل گه‌ل خێزانێن شه‌هیدان، تێكوشه‌ڕان، هه‌لگرێن مه‌دالیا بارزانى، په‌ككه‌فتیێن سه‌نگه‌ران و زیندانیێن سیاسى ل سنۆری ده‌ڤه‌را به‌هدینان كۆمبوو و راگه‌هاند، یا د دلێ هه‌وه دا ب ئاشكرایى بێژن.
باره‌گه‌هێ بارزانى راگه‌هاند، ئه‌ڤرۆ دوشه‌مبێ 21-8-2023یێ ل پارێزگه‌ها دهۆكێ سه‌رۆك مه‌سعوود بارزانى ب مه‌ره‌ما دیدار و ئاگه‌هدار بوون ل سه‌ر ره‌وشا ژیانا وان و پێشنیاز و تیبێنیان ل گه‌ل خێزانێن شه‌هیدان، تێكوشه‌ڕان، هه‌لگرێن مه‌دالیا بارزانى، په‌ككه‌فتیێن سه‌نگه‌ران، زیندانیێن سیاسى ل سنۆری ده‌ڤه‌را به‌هدینان كۆمبوو.
هه‌روه‌سا دیاركریه، د كۆمبوونێ دا سه‌رۆك بارزانى گۆتاره‌ك پێشكێشكر و تێدا به‌حس ل ره‌وشا سیاسى یا هه‌رێما كوردستانی و په‌یوه‌ندیێن هه‌رێما كوردستانێ و ئیراقا فیدرال كر.
باره‌گه‌هێ بارزانى ئاشكراكریه، سه‌رۆك بارزانى به‌حس ل ئاسته‌نگ و به‌رسینگرتنێن ل هه‌مبه‌رى خه‌لكێ كوردستانێ كر و دوپاتكر كو بایه‌خێ پابه‌ندبوون ب هۆشیاریا نه‌ته‌وه‌یى و ئاگه‌هداربوونا گه‌نجان و ڤه‌گه‌ڕیان بۆ پره‌نسیپان و نشتیمانپه‌روه‌رى.
خویاكریه ژى سه‌رۆك بارزانى پێزانێن خۆ بۆ قوربانیدان و ماندیبوونا خێزانێن شه‌هیدان و پێشمه‌رگه‌ى و تێكوشه‌ڕان هه‌بوو و راگه‌هاند، "هه‌رده‌م ژبۆ كه‌رامه‌ت و گه‌لێ خۆ خوین دایه و ماندیبوون و زه‌حمه‌ت كێشایه و هه‌رچى بۆ هه‌وه بهێته كرن كێمه، ئه‌ز هاتیمه گوهداریا داخوازى و گازنده‌یێن هه‌وه و ئێش و ئازارێن هه‌وه بكه‌م و داخوازێ ژ هه‌وه دكه‌م ئه‌وا د دلێ هه‌وه دا ب ئاشكرایى بێژن".
ل گۆره‌یى باره‌گه‌هی بارزانى، هه‌ر د كۆمبوونێ دا دانوستاندن ب ئاشكرایى و به‌رفره‌هى هاتنه كرن و ئاماده‌بوویان ژى پرسیار و داخوازی و تێبینیێن خۆ بۆ سه‌رۆك بارزانى دیاركرن.
