بۆ ئێكلاكرنا كێشهیا بودجهیى و مووچهیى ل گهل بهغدایێ دێ چ چێبیت؟
گاڤ
پشتى دو رۆژێن دانوستاندنان حكومهتێن ههرێم و ئیراقێ ل دۆر رهوانهكرنا مووچهیێ فهرمانبهرێن ههرێمێ و مافێن دارایى نهگههشتینه رێككهفتنێ، ب ڤێ یهكێ ژى پێشبینیه بۆ چارهكرنا كێشهیان پهنا بۆ سهرۆكوهزیر بهێته برن.
د دو رۆژێن بۆرى دا حكومهتێن ههرێم و ئیراقێ زێدهتر ژ سێ جاران كۆمبوون، شاندا ههرێمێ و حكومهتا ئیراقێ ل دۆر رهوانهكرنا مووچهیێ فهرمانبهرێن ههرێمێ و مافێن دارایى نهگههشتنه رێككهفتنێ، ب ڤێ یهكێ ژى و ل گۆڕهیى بڕگهیا حهفت یا ماددهیێ 13 ژ قانونا بودجهیى بڕیارا دوماهیێ دێ كهڤیته دهست سهرۆكوهزیران.
زانیارى دیاردكهن، ئهگهر د دهمهكێ كێم دا ههولێر و بهغدا نهگههشتنه رێككهفتنێ، لژنهیێن ههڤپشك ژ ههر دو ئالیان دێ هێنه پێكئینان و راسپاردهیێن ههر دو ئالیان دێ بۆ سهرۆكوهزیر، محهمهد شیاع سوودانى، سهرۆكوهزیرێ ئیراقێ هێنه رهوانهكرن، ئێك ژ دهرگههـ و ئهگهرێن ل ههمبهرى ههرێمێ بڕگهیا حهفت یا ماددهیا 13ێ یه ژ قانوونا بودجهیى كو دهستههلاتێ بۆ سهرۆكوهزیران ڤهدگهڕینیت، لێ ئهڤ پێنگاڤه ژى ل گۆڕهیى بسپۆران دبیت د بهرژهوهندا ههرێمێ دا نهبیت و سوودانى گوهداریا راسپاردهیێن لژنهیا ئیراقى بكهت، ب ئهگهرا گفاش و فشارێن چارچۆڤێ ههماههنگیێ و ههڤپهیمانیا ب رێڤهبرنا دهولهتێ.
پێشتر حكومهتێن ههرێما كوردستانێ و ئیراقێ رێككهفتینه، لێ حكومهتا ههرێمێ د بێژیت ئهوا ل سهر وان پێدڤى كریه و ئیراق قانوونا بودجهیى بجهـ نائینیت، ل دهمهكى ههموو رێكارێن بجهئینانا قانوونا بودجهیى ب دوماهى هاتینه و بۆ هندهك پارێزگههێن ئیراقێ مینا واست و بهسرا هندهك پاره ژى هاتیه رهوانهكرن و هێشتا بۆ ههرێما كوردستانێ ژبلى بجهئینانا پشكهكا بچووك ژ رێككهفتنا بهرى بودجهیى كو هنارتنا 400 ملیار دینارێن مههانهبوو كو دو مههه نههنارتین چ پارهیهك ژ بودجهیى نههاتیه رهوانهكرن.