ئه‌ردۆگان به‌حسێ په‌یوه‌ندیێن ل گه‌ل ئێكه‌تیا ئه‌ورۆپى دكه‌ت
بەلاڤ بکە
گاڤ
سه‌رۆكێ توركیا ئه‌ڤرۆ شه‌مبیێ راگه‌هاند كو ئێكه‌تیا ئه‌ورۆپى بزاڤان دكه‌ت خۆ ژ توركیا جودا بكه‌ت.
داخۆیانیا سه‌رۆكێ توركیا ل ده‌مێ ئاراسته‌كرنا پرسیاره‌كێ بۆ وى ل دۆر ناڤه‌رۆكا راپۆرته‌كا په‌رله‌مانێ ئه‌ورۆپى ل دۆر توركیا هات.
راپۆرتا په‌رله‌مانێ ئه‌ورۆپى ل حه‌فتیا بۆرى ئاماژه ب وێ چه‌ندێ كربوو كو د شیان دا نینه به‌رده‌وامى ب پرۆسێسا چوونا توركیا بۆ دناڤ ئێكه‌تیا ئه‌ورۆپى د كاودانێن نوكه دا بهێته دان، هه‌روه‌سا راپۆرتێ داخواز ژ ئێكه‌تیا ئه‌ورۆپى كربوو كو چارچووڤه‌یه‌كێ هه‌ڤته‌ریب و كه‌توارى بۆ په‌یوه‌ندیێن ل گه‌ل ئه‌نقه‌ره ببینیت.
هه‌روه‌سا راپۆرتێ دیاركربوو كو رێزگرتن ل بهایێن دیمۆكراسیێ، مافێن مرۆڤى، گره‌نتیكرنا سه‌روه‌ریا یاسایێ و ژماره‌یه‌كا دى یا ستانداردێن ئێكه‌تیا ئه‌ورۆپى رێگرن ل چوونا توركیا بۆ دناڤ وێ ئێكه‌تیێ دا.
ره‌جه‌ب ته‌یب ئه‌ردۆگان ژ به‌رى چوونێ بۆ ئه‌مریكا بۆ پشكداریێ د كۆمبوونێن نه‌ته‌وه‌یێن ئێكگرتى دا گۆت "ئێكه‌تیا ئه‌ورۆپى بزاڤان دكه‌ت خۆ ژ توركیا جودا بكه‌ت، ئه‌م دێ هه‌لسه‌نگاندنێن خۆ ل گۆره‌ى ڤان پێشهاتان ئه‌نجامده‌ین و ئه‌گه‌ر پێدڤى كر ئه‌م دێ خۆ ژ ئێكه‌تیا ئه‌ورۆپى دویر كه‌ین".
توركيا به‌رى 24 سالان ب فه‌رمى ببوو كاندید بۆ ئه‌ندامبوونێ دناڤ ئێكه‌تیا ئه‌ورۆپى دا لێ گۆتوبێژێن ئه‌ندامبوونێ ل سالێن دویماهیێ د سه‌ركه‌فتى نه‌بوون ژ به‌ر نیگه‌رانیێن گرێداى مافێ مرۆڤى و رێزگرتنێ ل سه‌روه‌ریا یاسایێ ل توركیا.
