ئەمریکا: پێدڤییە ئیراق هێزێن مە بپارێزیت
گاڤ
سوپایێ ئەمریکا جارەکا دی داخواز ژ ئیراقێ کر هێزێن وان بپارێزیت و راگەهاند: هەر هێزەکا هێرش بکەتە وان، ئەو دێ بەرسڤێ دەن.
شەڤادی هندەک گرۆپێن ئیراقی یێن چەکدار دو جاران بزاڤ کرن هێرش بکەنە سەر ژمارەکا سەربازگەهێن ئەمریکی، لێ د هەردو بزاڤان دا شکەستن.
پشتی وان بزاڤێن سەرنەکەفتی، رۆیتەرز ژ زارێ پاتریک رایدەر، ئەفسەر ل هێزێن ئاسمانی یێن ئەمریکی راگەهاند: ئەمریکا جارەکا دی داخواز ژ ئیراقێ دکەت هێزێن ئەمریکی یێن ل ناڤ ئاخا وێ، بپارێزیت.
وی ئەفسەری هەروەسا دوپات کرییە: وان حکومەتا ئیراقێ ب فەرمی ئاگەهدار کرییە کو هەر هێرشەکا ل دژی هێزێن ئەمریکی بهێتە کرن، ئەو دێ بێی دودلی بەرسڤێ دەن.
نوکە ئەمریکا ب فەرمی نێزیکی 2500 سەرباز و ئەفسەران ل ئیراقێ و 900 سەرباز و ئەفسەر ل رۆژئاڤایێ کوردستانێ هەنە و گرۆپێن ئیراقی یێن نێزیکی ئیرانێ، چەندین جاران هێرش دکەنە سەر سەربازگەهێن ئەمریکی.