گاڤ

ل ئەمریکا پرۆژەیاسایەک دژی کۆمپانییا تیک تۆکێ هاتە پەسەندکرن و گەر سەرۆکێ وی وەلاتی ئیمزا بکەت، دبیت تیک تۆک ل وی وەلاتی بهێتە قەدەغەکرن.

کۆنگرێسێ ئەمریکا ب پڕانییا دەنگان پرۆژەیاسایەک پەسەند کر و ل گۆرەی وێ پرۆژەیاسایێ، پێدڤییە کۆمپانییا بایتدانس کو چین خودانا وێ یە، پشکێن د نەهـ مەهێن بهێن دا پشکێن خۆ ژ وێ کۆمپانییێ بفرۆشیت، گەر نە، تیک تۆک دێ ل ئەمریکا هێتە قەدەغەکرن.

تاکو ئەڤ پرۆژەیاسایە ب دروستی دکەڤیتە د وارێ بجهئینانێ دا، پێدڤییە جۆ بایدن، سەرۆکێ ئەمریکا وێ پرۆژەیاسایێ ئیمزا بکەت و پێشتر وی راگەهاندبوو: هەر دەما کۆنگرێسی پرۆژەیاسا پەسەند کر، ئەو دێ ئێکسەر ئیمزا کەت.

پەسەنکرنا ڤێ پرۆژەیاسایێ ژ ئالییێ کۆنگرێسێ ئەمریکا ڤە د دەمەکی دایە کو ژڤانە ئەڤرۆ ئەنتۆنی بلێنکن، وەزیرێ دەرڤە یێ ئەمریکا بچیتە چینێ و ل گەل بەرپرسێن وی وەلاتی بابەتێن گرێدایی پشتەڤانییا چینێ بۆ رۆسیا د شەڕێ ل دژی ئۆکراینا دا و هەروەسا بابەتێن گرێدایی مەترسییا ژیرییا دەستکرد گۆتوبێژ بکەت.