گاڤ

راپۆرته‌كا نوى دیاركریه‌؛ نه ‌یا ساخله‌مه ژ روویێن جه‌سته‌یى و ده‌روونى ڤه‌‌ بۆ زارۆكێن د بن ته‌مه‌نێ 13 سالیێ دا موبایلا ئه‌نترنێت ل گه‌ل هه‌ى بكاربینن، هه‌روه‌سا نه‌ یا دروسته‌ به‌رى ته‌مه‌نێ 11 سالیێ موبایلا بێى ئه‌نترنێت ژى بكاربینن.

راپۆرته‌كا نوى كو ژ لایێ ژماره‌یه‌كا شاره‌زایان ڤه‌ ل سه‌ر راسپارده‌یا ئیمانوێل ماكرۆن سه‌رۆكێ فره‌نسا ڤه‌ هاتیه‌ به‌رهه‌ڤكرن، دیاركریه‌ "نابیت رێك ب زارۆكان بهێته‌ دان موبایلا ئه‌نترنێت ل گه‌ل هه‌ى بكاربینن هه‌تا نه‌گه‌هنه‌ ته‌مه‌نێ 13 سالیێ".

هه‌ر ل گۆره‌ى وێ راپۆرتێ "ده‌مێ زارۆك د ته‌مه‌نێ دناڤبه‌را 11 تا 13 سالیێ دا موبایلێ بكاردئینن، پێدڤییه‌ ئه‌نترنێت د وێ موبایلێ دا نه‌بیت"، وه‌كى رۆژنامه‌یا گاردیان ئاماژه‌پێكرى.

زێده‌ ژى كریه‌ "هه‌روه‌سا د ته‌مه‌نێ به‌رى 11 سالیێ دا، د بنى را نابیت زارۆكان موبایل هه‌بیت".

راپۆرت زێده‌ ژى دكه‌ت "كه‌سێن تا 15 سالیێ، پێدڤییه‌ ب تنێ بشێن ئالاڤێن سۆشیال میدیایێ یێن ئه‌خلاقى بكاربینن و نابیت بشێن ئالاڤێن سۆشیال میدیایێ یێن وه‌كى تیك تۆك، ئینستاگرام و سناپچه‌تى بكاربینن هه‌تا ته‌مه‌نێ وان نه‌گه‌هیته‌ 18 سالان".

ئاماژه‌ ب وێ چه‌ندێ ژى كریه‌ "پێدڤیه‌ هه‌مى جۆرێن شاشه‌یان ژ زارۆكێن د بن 6 سالیێ دا و ل باخچه‌یێن زارۆكان بهێنه‌ قه‌ده‌غه‌كرن".

راپۆرتێ ره‌خنه‌ ل پیشه‌سازییا ته‌كنولۆژیایى گرتییه‌ و دیاركریه‌ كو ئه‌و پیشه‌سازییه‌ بزاڤان دكه‌ت قازانجان ب رێكا زارۆكان بده‌ستڤه‌بینیت.