گاڤ

پەرلەمانێ ئیراقێ ل رۆژا شەمبییا بهێت دێ کۆم بیت و هەلبژارتنا سەرۆکەکێ نوی بۆ پەرلەمانی د کارنامەیا روینشتنێ دا نینە.

ل گۆرەی کارنامەیا روینشتنا پەرلەمانێ ئیراقێ یا رۆژا شەمبی رێکەفتی 27-4-2024ێ، ل بڕگەیا ئێکێ یا روینشتنێ، دێ دەنگ ب پێشنیازەیاسایا راستڤەکرنا ئێکێ ژ یاسایا لەشفرۆشییێ یا ژمارە 8 یا سالا 1988ێ هێتە دان.

د برگەیا دویێ یا روینشتنا پەرلەمانێ ئیراقێ دا، دێ دەنگ ب پرۆژەیاسایا راستڤەکرنا ئێکێ یا یاسایا رێکخستنا ب کرێدانا ئەردێن چاندنێ یێن حکومەتێ ب دەرچوویێن پشکێن چاندنێ و ڤێتێرنەری یا ژمارە 24 یا سالا 2013ێ یە.

برگەیا سێیێ یا روینشتنا پەرلەمانی دەربارەی پرۆژەیاسایا لێخۆشبوونا هەڤپشک د ناڤبەرا ئیراقێ و کۆریا باشۆر دایە بۆ هەلگرێن پاسپۆرتێن دپلۆماسی کو ژ رێکارێن هاتنوچوونا د ناڤبەرا هەردو وەلاتان دا لێبۆرین بۆ هەلگرێن وان پاسپۆرتان هەبیت.

د برگەیا چارێ و دویماهییێ دا پەرلەمانێ ئیراقێ دێ خواندنا ئێکێ بۆ پرۆژەیاسایا ڤەگەڕاندنا مولکان بۆ خودانێن وان ل دویڤ ژمارەکا بریارێن جڤاتا سەرکرداتییا شۆرەشێ (مجلس قيادة الثورة) یا ژناڤچووی کەت.