گاڤ

ژ به‌ر كێمبوونا پاره‌یێ نه‌ختینه‌یى ل ده‌ف حكومه‌تا ئیراقێ و كورتئینانێ د بودجه‌یێ دا، هنارتنا بودجه‌یێ ژ لایێ حكومه‌تا ئیراقێ ڤه‌ بۆ په‌رله‌مانی گیرۆبوویه‌ و پێشنیار هاتیه‌ كرن سفڕێن سه‌ر دینارێ ئیراقى بهێنه‌ لادان.

جه‌مال كۆچه‌ر ئه‌ندامێ لژنه‌یا دارایى یا په‌رله‌مانێ ئیراقێ ئه‌ڤرۆ چارشه‌مبییێ بۆ گاڤ راگه‌هاند "پێدڤى بوو به‌ر‌ى شه‌ش هه‌یڤان خشته‌یێن بودجه‌یێ و هه‌مواركرنا بودجه‌یێ گه‌هشتبا لژنه‌یا دارایى یا په‌رله‌مانى، لێ یا دیار نینه‌ كه‌نگى دێ گه‌هیت".

گۆت ژى "هه‌مواركرنا بڕگه‌یێن تایبه‌ت ب پشكا هه‌رێما كوردستانێ زێده‌بارى خه‌رجیێن حكومه‌تێ بۆ سالا 2024 د بودجه‌یێ دا هه‌نه‌".

دیار ژى كر "ئاماده‌كرنا خشته‌یێن بودجه‌یێ ل وه‌زاره‌تا دارایى یا ئیراقێ ته‌مامبوویه‌ و ژ بۆ جڤاتا وه‌زیرێن ئیراقێ هاتیه‌ هنارتن".

سه‌باره‌ت ئه‌گه‌رێن گیرۆبوونا هنارتنا بودجه‌یێ ژ لایێ جڤاتا وه‌زیرێن ئیراقێ ڤه‌ بۆ په‌رله‌مانى، وى په‌رله‌مانتارى خۆیاكر "گیرۆبوونا هنارتنێ ژ به‌ر كێمبوونا پاره‌یێ نه‌ختینه‌یى یه‌".

د نوكه‌ دا، گه‌له‌ك ژ خه‌لكێ ئیراقێ پاره‌ى هه‌لدگرن و ب ڤێ چه‌ندێ كێشه‌یا كێمبوونا نه‌ختینه‌یێ په‌یدابوویه‌، وى په‌رله‌مانتارى ئاشكرا كر "گه‌له‌ك پاره‌ ل ده‌ف وه‌لاتییانه‌ و هه‌لگرتینه‌، وه‌زیرێ پلاندانانێ یێ ئیراقێ پێشنیاركریه‌ سفرێن ل سه‌ر دینارێ ئیراقى بهێنه‌ لادان و پاشى ده‌مه‌ك بهێته‌ دیاركرن دا كو وه‌لاتى نه‌چار ببن پاره‌یێن خۆ ژ بۆ گوهۆڕینا وان ڤه‌گه‌ڕینن، هه‌ر ل گۆره‌ى پێشنیارێ، پشتى ڤه‌گه‌ڕیانا پاره‌یێ وه‌لاتییان بۆ حكومه‌تێ، دێ ب هژمارا ئه‌له‌كترۆنى ب رێكا كارتا به‌نكى وه‌لاتى هێنه‌ قه‌ره‌بووكرن و پاره‌ دێ چیته‌ سه‌ر هژمارا وان یا به‌نكى و ب ڤێ چه‌ندێ حكومه‌ت پێدڤى ب پاره‌یێ چاپكرى نابیت".

ب پتر ژ 80 تریلیۆن دیناران كورتئینان د بودجه‌یا ئیراقێ یا ئه‌ڤ ساله‌ دا هه‌یه‌ و ل گۆره‌ى هنده‌ك ژێده‌ران، ئه‌ڤه‌ ئێك ژ ئه‌گه‌رێن گیرۆبوونا هنارتنا خشته‌یێن بودجه‌یێ یه‌ ژ لایێ جڤاتا وه‌زیران بۆ په‌رله‌مانێ ئیراقێ.

لژنه‌یا دارایى یا په‌رله‌مانێ ئیراقێ به‌رى نوكه‌ ئێك ژ ئه‌گه‌رێن گیرۆبوونا هنارتنا بودجه‌یا گشتى بۆ په‌رله‌مانى ئاشكرا كربوو.

موعین كازمى ئه‌ندامێ لژنه‌یێ بۆ گاڤ دیاركربوو "ژ به‌ر گوهۆڕینا خشته‌یێن بودجه‌یێ، هنارتنا وێ بۆ جڤاتا نوینه‌ران گیرۆبوویه‌".

دیار ژى كربوو "بودجه‌یا سالا 2024ێ 228 تریلیۆن دینارن پشتى زێده‌كرنا خه‌رجیێن بكاربرنێ و وه‌به‌رهێنانێ، كورتئینانا پێشبینیكرى ژى 80 تریلیۆن دینارن، ل ده‌مه‌كێ بودجه‌یا سالا 2023ێ 199 تریلیۆن دینار بوون".
ئاشكرا ژى كربوو "جڤاتا وه‌زیران پشتى ب دویماهیك هاتنا سه‌ره‌دانا محه‌مه‌د شیاع سوودانى سه‌رۆكوه‌زیرێ ئیراقێ بۆ ئه‌مریكا و ڤه‌گه‌ڕیانا وى بۆ به‌غدا دێ ده‌نگى ل سه‌ر خشته‌یێن بودجه‌یێ ده‌ت و ل دویماهییا ڤێ هه‌یڤێ دێ بودجه‌ گه‌هیته‌ په‌رله‌مانى".
لژنه‌یا دارایى یا په‌رله‌مانێ ئیراقێ ل دویماهییا شوباتا بۆرى ته‌مامكرنا وه‌زاره‌تا دارایى بۆ به‌رهه‌ڤكرنا خشته‌یێن بودجه‌یا سالا 2024 راگه‌هاند بوو و دیاركربوو كو د هه‌یڤا ئادارێ دا دێ بۆ په‌رله‌مانى هێته‌ ره‌وانه‌كرن، لێ هه‌تا نوكه‌ بۆ په‌رله‌مانى نه‌هاتیه‌ ره‌وانه‌كرن.