گاڤ – تایبەت

پرۆسەیا هویربینییێ بۆ لیستێن مووچەیێ فەرمانبەرێن هەرێمێ ل بەغدا بەردەوامە و ل گۆرەى زانیاریێن گاڤ، ل دەستپێکا حەفتییا بهێت دێ دەست ب بەلاڤکرنا مووچەیێ فەرمانبەرێن هەرێمێ هێتەکرن.

ژێدەرەکى ژ وەزارەتا دارایی یا ئیراقێ بۆ گاڤ راگەهاند: لیستێن مووچەیێن فەرمانبەرێن هەرێمێ ل بەردەستێ وەزارەتێ نە و هویربینى تێدا دهێنەکرن و تا سوبەهى دێ هویربینى تەمام بیت و تا رۆژا ئێکشەمبى دێ پارەیێ پێدڤى بۆ مووچەیی، گەهیتە سەر هەژمارا بانکى یا هەرێمێ.

وى ژێدەرى گۆت ژى: لیستێن مووچەیێ فەرمانبەران و خانەنشینان و هێزێن ئێمناهیێ ژى گەهشتینە بەر دەستێ وان و چ کێشە تێدا نینن، دەربارەى پلەبلندکرنێ ژى، ژێدەرێ گاڤ دبێژیت: ڤێ هەیڤێ لیستێن مووچەیی بێ پلەبلندکرن گەهشتینە دەستێ وان.

هەڤدەم ل گۆرەى زانیاریێن گاڤ، ل گەل گەهشتنا پارەى ژ بەغدا، هەمى ئامادەکارى هاتینەکرن و وەزارەتا دارایی یا هەرێمێ دێ ئێکسەر دەست ب بەلاڤکرنا مووچەیی کەت.