كۆمپانییا ئه‌پل دێ ئێڤێنتا خۆ یا نوى گێڕیت
بەلاڤ بکە
گاڤ
كۆمپانییا ئه‌پل ل رۆژا 7ى ڤێ هه‌یڤێ دێ ئێڤێنتا خۆ یا نوى گێریت و دهێته چاڤه‌رێكرن ژماره‌یه‌كا ئامیره و گوهۆڕینان تێدا به‌رده‌ستبكه‌ت.
ئه‌پل چ زانیارى ل دۆر ئێڤێنتێ به‌لاڤنه‌كرینه، ژبلى هنارتنا هنده‌ك داخوازنامه‌یان بۆ هنده‌ك ده‌زگه‌هێن راگه‌هاندنێ یێن جودا جودا كو تێدا پێنڤیسه‌ك تێدا هاتیه نڤیسین و ئه‌ڤه نیشانا وێ چه‌ندێ یه كو ئامیره‌یێن ئایپاد دێ ته‌وه‌رێ سه‌ره‌كى بن د ئێڤێنتێ دا.
هه‌ر ژ سالا 2022، ئه‌پل چ ئایپاد به‌رده‌ستنه‌كرینه هه‌روه‌سا هه‌ر ژ سالا 2018 چ گوهۆڕینێن مه‌زن د ئامیره‌یێن وێ یێن ئایپاد دا نه‌بووینه.
ئه‌پل ره‌نگه د ئێڤێنتا خۆ دا، نویترین ڤێرژنێن ئامیره‌یێن خۆ یێن ژ جۆرێ ئایپاد پرۆ iPad Pro و ئایپاد ئێر iPad Air رابگه‌هینیت، د مودێلێن نوى یێن ئایپاد پرۆ و ئایپاد ئێر دا، دێ ئێكه‌م گوهۆڕینا ب ته‌مامى تێدا هه‌بن هه‌ر ژ سالا 2018 تا نوكه.
زێده‌بارى ئامیره‌یێن iPad یێن نوى، دهێته چاڤه‌رێكرن كۆمپانییا ئه‌پل هنده‌ك ڤێرژنێن نوى ژ ئامیره‌یێن پاشكۆ ژى وه‌كى پێنڤیسێ ئه‌پل Apple Pencil رابگه‌هینیت كو دێ ساخله‌تێن نوى تێدا هه‌بن.
هه‌روه‌سا چاڤه‌رێ یه ڤێرژنێ نوى ژ كیبۆردێ Magic Keyboard یێ ئامیره‌یێن ئایپاد ژى به‌رده‌ستبكه‌ت كو ب رێكا وێ دێ شێوه‌یێ ئامیره‌یێ iPad پتر وه‌كى لاپتۆپى لێهێت.
ئێڤێنتا ئه‌پل د ده‌مه‌كێ دایه كو كۆمپانى د ده‌مه‌كێ ب زه‌حمه‌ت دا دبۆریت پشتى كێمبوونا فرۆشتنا موبایلێن ئایفۆن ب رێژه‌یا 10% د چارێكا ئێكێ یا ئه‌ڤ ساله دا و كێمبوونا داهاتێن كۆمپانییێ ل سه‌ر بنیاته‌كێ سالانه ژ 51.33 ملیار دۆلاران بۆ 45.96 ملیار دۆلاران.
هه‌روه‌سا فرۆشتنا ئامیره‌یێن ئایپاد ب رێژه‌یا 17% ب هه‌ڤبه‌ركرن ل گه‌ل سالا بۆرى كێمبوویه و ژ 6.67 ملیار دۆلاران بۆ 5.56 ملیار دۆلاران كێمبوویه.
