گاڤ

پۆلیسێن لبنانێ دیتنا تەرمێ گەشتیارەکێ ئیراقی راگەهاند و ل گۆرەی زانیاریێن گاڤ، ئەو تەرم یێ وەلاتیەکێ خەلکێ پارێزگەها دهۆکێ یە.

دەزگەهێن مەدیایی یێن لبنانێ ل گۆرەی هێزێن ئێمناهیێ یێن وی وەلاتی راگەهاند: بەری 11 رۆژان نووچەیێ بەرزەبوونا گەشتیارەکێ ئیراقی گەهشتبوو وان، دەما چار رۆژان بوو وان دەست ب لێگەڕیانێ کری و شیان دوهی تەرمێ وی ل سەر رێیەکا نەسەرەکی یا باژێڕکێ بەقعتوتە ل کەسرەوانێ ببینن.

ژێدەران ئاماژە دایە: پشتی لێکۆلین تەمام بووین دیاربوویە ئەو تەرم یێ وەلاتیەکێ ئیراقی یە ب ناڤێ (ئـ. ئـ. ح) کو ژدایکبوویێ سالا 1981ێ یە و ل ناڤەراستا ڤێ مەهێ ل گەل 3 وەلاتیێن دی یێن ئیراقی چووبوو لبنانێ.

ل گۆرەی زانیاریێن گاڤ، ئەو تەرم یێ وەلاتیەکێ پارێزگەها دهۆکێ یە کو بەری 11 رۆژان ژ ئەگەرێ کێشەیەکا جڤاکی ل لبنانێ هاتبوو کوشتن.