گاڤ

بهایێن په‌ترۆلێ د سه‌ره‌ده‌ریێن جیهانى دا بلندبوونه‌كا نوى تۆماركرن و بۆ جارا ئێكێ پشتى پتر ژ پێنج هه‌یڤان بهایێ به‌رمیله‌كێ په‌ترۆلا برێنت چوو د سه‌ر 90 دۆلاران دا.

ژ به‌ر به‌رده‌وامییا ئه‌ندامێن ئوپێك پله‌س د سیاسه‌تا كێمكرنا به‌رهه‌مئینانێ دا، به‌رده‌وامییا گرژیێن جیۆسیاسى ل رۆژهه‌لاتا ناڤین و نووچه‌یێن قۆتكرنا ئیماراتێ بۆ په‌یوه‌ندیێن خۆ ل گه‌ل ئسرائیلێ هه‌روه‌سا پێشبینیێن ل دۆر زێده‌بوونا داخوازیێ ل سه‌ر په‌ترۆلێ و كێمبوونا رێژه‌یا په‌ترۆلا عومباركرى ل ئه‌مریكا، بهایێن په‌ترۆلێ به‌رده‌وام د بلندبوونێ دانه‌.

ئاژانسان به‌لاڤكرینه‌؛ بهایێ به‌رمیله‌كێ په‌ترۆلا برێنت ئه‌ڤ شه‌ڤه‌ بۆ جارا ئێكێ هه‌ر ژ رۆژا 29/10/2023 چوو د سه‌ر 90 دۆلاران دا.

دیار ژى كرینه‌ "بهایێ په‌ترۆلا برێنت ب رێژه‌یا 1.5% بلند بوو و بهایێ به‌رمیله‌كێ گه‌هشته‌ 90.65 دۆلاران".

هه‌روه‌سا بهایێن په‌ترۆلا رۆژئاڤایێ تێكساس یا ناڤنجى یا ئه‌مریكى WTI ژى ب رێژه‌یا 0.14% بلند بوون و بهایێ به‌رمیله‌كێ گه‌هشته‌ 85.8 دۆلاران.

هه‌ڤپه‌یمانییا ئوپێك پله‌س دوهى چارشه‌مبیێ بڕیار دابوو سیاسه‌تا كێمكرنا به‌رهه‌مئینانا په‌ترۆلێ بێى گوهۆڕین بهێلیت پشتى د هه‌یڤا بۆرى دا بڕیارا درێژكرنا كێمكرنا به‌رهه‌مئینانێ هه‌تا هه‌یڤا خزیرانێ داى.