گاڤ

دادگەها ئەرجەنتینێ کۆمارا ئیسلامی یا ئیرانێ ب وەلاتەکێ تیرۆری ناڤ دکەت و ب دو هێرشان ل سالێن نۆتان ژ چەرخێ بۆری تومەتبار دکەت.

ل سالا 1992یێ و ل سالا 1994ێ دو هێرش ل باژێڕێ بۆینس ئایرس، پایتەختێ ئەرجەنتینێ هاتبوونە کرن. ئارمانجا هێرشا ئێکێ بالیۆزخانەیا ئسرائیلێ بوو و 29 کەس هاتبوونە کوشتن و ئارمانجا هێرشا دویێ، کۆمەلەیا هەڤکارییا ئسرائیلی ئەرجەنتینی بوو و د وێ هێرشێ دا 85 کەس هاتبوونە کوشتن و پتر ژ 300 کەسان بریندار ببوون.

کارلۆس ماهیکیس، ئێک ژ دادوەرێن دادگەها بلند یا ئەرجەنتینێ بۆ رادیۆیا "کۆن فۆکس" گۆت: ئەو گەهشتینە وێ باوەرییێ کو هەردو هێرش حزبوللایێ ب پشتەڤانییا ئیرانێ کرینە، لەورا ئەو ئیرانێ ب وەلاتەکێ تیرۆرستی دزانن.

هەر د بریارا دادگەها ئەرجەنتینێ دا هاتییە: ئەو تاوانێن هاتینە کرن، تاوانێن ل دژی مرۆڤاتییێ بوون و عەلی ئەکبەر هاشمی رەفسەنجانی و ژمارەکا دی یا بەرپرسێن ئیرانی یێن وی دەمی و ژمارەکا ئەندامێن حزبوللایێ ژ وان هێرشان بەرپرسیارن.