راپرسییهك ئهگهرێن سهرنهكهفتنا پارتا داد و گهشهپێدان د ههلبژارتنێن باژێڕڤانیێن توركیا دا دیار دكهت
گاڤ
راپرسییهكا نوى ل توركیا ئهگهرێن سهرنهكهفتنا پارتا داد و گهشهپێدان د ههلبژارتنێن باژێڕڤانییان دا دیاركرینه و رهوشا ئابوورى ل سهرێ لیستا ئهگهران هات.
د ههلبژارتنێن بۆرى یێن باژێڕڤانیێن توركیا دا، رێژهیا دهنگێن پارتا داد و گهشهپێدان 34.48% بوو ل دهمهكێ د ههلبژارتنێن باژێڕڤانییان یێن توركیا یێن سالا 2019 دا رێژهیا دهنگێن وێ پارتێ 44.33% بوو.
پارتا داد و گهشهپێدان نهشیا باژێڕڤانیێن ئهنقهره و ستهنبۆلێ و هندهك باژێڕێن دى یێن گرنگ بدهستڤهبینیت پشتى سهركهفتنا بهربژارێن پارتا گهل یا كۆمارى د ههلبژارتنێن وان باژێڕڤانییان دا.
سازییا ASAL یا لێكۆلین و راپرسییان ل توركیا، راپرسییهك ب پشكدارییا 2000 كهسان بۆ دهستنیشانكرنا ئهگهرێن كێمبوونا دهنگێن پارتا داد و گهشهپێدان د ههلبژارتنێن ناڤخۆیى یێن ئهڤ ساله دا ئهنجامدایه.
د راپرسییێ دا دیاربوویه؛ 51.9% ژ پشكداران ئهگهرێ ئێكێ یێ سهرنهكهفتنا پارتا داد و گهشهپێدان د ههلبژارتنان دا بۆ ئهگهرێن وهكى رهوشا ئابوورى، ههلئاوسان و گڕانییا تێچوویێن ژیارێ ڤهگهڕاندینه.
ههروهسا زێدهنهكرنا حكومهتێ بۆ مووچهیێن خانهنشینان د پلهیا دوێ یا ئهگهران دا هاتیه كو 13.4% ژ پشكداران ل گهل وێ بۆچوونێ نه ههروهسا ئهگهرێ سیێ ههلبژارتنا بهربژارێن نهگونجاى د ههلبژارتنان دا بوو كو 12.5% ژ پشكداران ل گهل وێ بۆچوونێ بوون.
ههروهسا 4% یا پشكداران ئهگهران بۆ كێشهیا پهنابهران و 3.8% ژ پشكداران ئهگهران بۆ دابڕانا كارگێرییا پارتا داد و گهشهپێدان ژ وهلاتییان ڤهگهڕاندینه.