ئێكهتییا ئهورۆپى رهخنهیێ ل كۆمپانییا مێتا دگریت
بەلاڤ بکە
گاڤ
ئێكهتییا ئهورۆپى رهخنه ل كۆمپانیا مێتا گرتن چونكى ب تنێ ب رێكا دانا پارهى ریكلام بۆ بكارهینهرێن فهیسبووك و ئینستاگرامى دیار نابن و ئهگهر پارهى نهدهن دێ داتایێن وان ژ بۆ نیشاندانا ریكلامان بۆ وان هێنه بكارئینان.
د نوكه دا ل وهلاتێن ئێكهتییا ئهورۆپى پێدڤیه بكارهینهر 10 یۆرۆیان ئانكۆ 11 دۆلاران وهك پشكدارییا ههیڤانه بدهت دا كو ریكلامان د فهیسبووك و ئینستاگرامى دا نهبینن، یا دیاره ژى كو پلاتفۆرمێن فهیسبووك و ئینستاگرامى داتایێن بكارهینهران بكاردئینن دا كو وان ریكلامان بۆ وان پێشچاڤبكهن یێن ل گهل وان دگونجن.
مێتایێ ئهڤ خزمهتگۆزارییه بهردهستكربوو، ئێكهتییا ئهورۆپى ژى لێكۆلینێ دكهت كا دێ ئهڤ سیستهمه یێ گونجاى بیت ل گهل یاسایا بازارێن دیجیتال یا ئهورۆپى ئهوا ل دهستپێكا ههیڤا ئادارا بۆرى كهفتییه د وارێ بجهئینانێ دا یان نه.
ل گۆرهى راپۆرتهكا ئێنگاجێت؛ ئێكهتییا ئهورۆپى دبینیت كو نابیت ل سهر بكارهینهرێ بهێته سهپاندن كو یان پارهیێ پشكدارییا ههیڤانه بدهت یان ژى داتایێن وى بهێنه بكارئینان.
جڤاتا ئهورۆپى یا پاراستنا داتایان EDPB دیار دكهت "سامپلێن رازیبوون یان پارهدان ل گهل پێدڤیاتیێن رازیبوونێ یێن باش ناگونجیت دهمێ ل سهر مرۆڤى دهێته سهپاندن پارهى بدهت بهرانبهر پاراستنا تایبهتمهندییا خۆ یان ژى داتایێن وى بۆ نیشاندانا ریكلامان بۆ وى دێ هێنه بكارئینان".
