وه‌زیرێ ده‌رڤه‌ یێ ئیرانێ حسێن ئه‌میر عه‌بدولاهییان درۆنێن شه‌ڤا ئه‌ینى یێن ئسرئیلێ كو هێرش پێهاتبوو كرن بۆ سه‌ر ئیرانێ وه‌كى یاریكێن زارۆكان بناڤكرن.
پشتى هێرشا ئسرائیلێ بۆ سه‌ر كونسۆلخانه‌یا ئیرانێ ل دیمه‌شقا پایته‌ختێ سووریێ، ئیرانێ ب رێكا سه‌دان درۆن و مۆشه‌كان هێرشى ئسرائیلێ كر، ئسرائیلێ ژى گه‌فێن به‌رسڤدانێ كربوون و شه‌ڤا ئه‌ینییا بۆرى ب هژماره‌كا درۆنان هێرشى باكورێ رۆژئاڤا باژێڕێ ئه‌سفه‌هان یێ ئیرانێ كر.
وه‌زیرێ ده‌رڤه‌یێ ئیرانێ بۆ كه‌نالێ (ئێن بى سی) راگه‌هاند، ئه‌وا شه‌ڤا ئه‌ینى چێبووى نه‌ هێرش بوو، هنده‌ك درۆن بوون ل ئاسمانێ ئیرانێ هاتینه‌ دیتن و لێكۆلینان ده‌ستپێكرى یه‌ بۆ زانینا ژێده‌رێ ئاراسته‌كرنا وان.
د ئالییه‌كێ دی یێ داخۆیانیێن خۆ دا، عه‌بدوللاهیان گۆت، ئه‌گه‌ر ئسرائیل چ شاشییان نه‌كه‌ت و هێرشى ئیرانێ نه‌كه‌ت، وه‌لاتێ وى ژى لبه‌ر نینه‌ چ هێرشان بكه‌ت.