گاڤ

كۆمپانییا ئه‌پل ژ گرێدانا هه‌ڤبه‌سته‌كا گرنگ ل گه‌ل فیفایێ ژ بۆ بده‌ستڤه‌ئینانا مافێن په‌خشكرنا قاره‌مانییه‌كا مه‌زن یا ته‌پاپێى یا فیفایێ بۆ په‌خشكرنا وێ ل سه‌ر ته‌له‌ڤزیۆنا خۆ Apple TV + نزیكبوویه‌.

ل گۆره‌ى راپۆرته‌كا نیویۆرك تایمز ئه‌ڤرۆ دوشه‌مبییێ "كۆمپانییا ئه‌پل ژ گرێدانا رێككه‌فتنه‌كا گرنگ ل گه‌ل ئێكه‌تییا ته‌پاپێى یا نێڤده‌وله‌تى (فیفا) ژ بۆ بده‌ستڤه‌ئینانا مافێن په‌خشكرنا قاره‌مانییه‌كا نوى یا مه‌زن نزیكبوویه‌ و ب ڤێ چه‌ندێ كۆمپانییا ئه‌پل یا ته‌كنولۆژى دێ چیته‌ دناڤ جیهانا په‌خشكرنا یاریێن وه‌رزشى دا".

وێ رۆژنامه‌یێ دیار ژى كریه‌ "گۆتوبێژێن دناڤبه‌را ئه‌پل و فیفایێ دا به‌ره‌ڤ پێشڤه ‌دچن و ل گۆره‌ى وێ دێ مافێ په‌خشكرنا قاره‌مانییێ بۆ جه‌ماوه‌رى ل جیهانێ بۆ كۆمپانییا ئه‌پل هێته‌ دان".

تا نوكه‌ دیار نه‌بوویه‌ كا كیژ قاره‌مانییا فیفایێ یه‌ كو ئه‌پل دێ مافێ ڤه‌گوهاستنا وێ وه‌رگریت هه‌روه‌سا هویركاتیێن دارایى ژى یێن هه‌ڤبه‌ستێ نه‌هاتینه‌ زانین.

ئه‌ڤ چه‌نده‌ د ده‌مه‌كێ دایه‌ كو ئه‌پل د بزاڤێن به‌رفره‌هكرنا په‌خشكرنێ ل سه‌ر پلاتفۆرما په‌خشكرنێ یا تایبه‌ت ب وێ ڤه‌ Apple TV + به‌رده‌وامه‌.

د نوكه‌ دا بهایێ بازارى یێ كۆمپانیا ئه‌پل 2.56 تریلیۆن دۆلارێن ئه‌مریكى نه‌ و ئه‌و بزاڤان دكه‌ت هه‌بوونا خۆ د بازارێن جیهانى دا ب هێز بكه‌ت.