گاڤ

وەزیرێ ژێدەرێن ئاڤێ یێ ئیراقێ راگەهاند: وان پلان دانایە ئیراقێ ژ وەلاتەکێ بیابانی بکەنە دارستان و د چارچووڤەیێ وێ پلانێ دا، ئەو دێ 5 ملیۆن داران چینن.

عەون زیاب عەبدوللا، وەزیرێ ژێدەرێن ئاڤێ یێ ئیراقێ ئەڤرۆ رۆژا پێنجشەمبی راگەهاند: وان پلان دانایە ب چاندنا 5 ملیۆن داران ئیراقێ ژ وەلاتەکێ هشک و بیابانی بکەنە وەلاتەکێ دارستان و ئەو دارێن دهێنە چاندن، 3 ملیۆن دێ دارێن قەسپان بن و 2 ملیۆن دارێن زەیتوون و هناران بن.

وەزیرێ ژێدەرێن ئاڤێ یێ ئیراقێ هەروەسا دیار کر: ئەو دێ ب رێکا دابینکرنا ئاڤا سەرئەرد و ئاڤا ژێرئەرد و ب بکارئینانا سیستەمێن سەردەم، ئاڤێ بۆ وان داران دابین کەن.

راگەهاندنا وەزارەتا ژێدەرێن ئاڤێ یا ئیراقێ د دەمەکی دایە کو ئیراقێ د چارچووڤەیێ رێککەفتن و یاداشتنامەیێن ل گەل تورکیا دا، هندەک رێککەفتن بۆ چێکرنا ژمارەکا بەنداڤان ل سەر رویبارێن دیجلە و فورات کرینە.