گاڤ

سه‌رۆكێ حكومه‌تا هه‌رێما كوردستانێ داخواز ژ حكومه‌تا فیدرالى كر لێكۆلینێ ل دۆر هێرشا كۆرمۆر بكه‌ت و لێپرسینێ ل گه‌ل ئه‌نجامده‌ران بكه‌ت و راگه‌هاند؛ ئه‌م به‌رهه‌ڤین هه‌ماهه‌نگییێ ل گه‌ل به‌غدا بكه‌ین دا كو سنووره‌ك بۆ ڤان هێرشان بهێته‌ دانان.

مه‌سروور بارزانى سه‌رۆكێ حكومه‌تێ د به‌یانه‌كێ دا به‌رى ده‌مه‌كێ كێم راگه‌هاند "هێرشا تیرۆرستى یا ئه‌ڤ شه‌ڤه‌ ل سه‌ر كێلگه‌ها كۆرمۆر ب توندى شه‌رمزار دكه‌م و سه‌ره‌خۆشییێ ل كه‌سوكارێن وان چار وه‌لاتییان دكه‌م یێن شه‌هید بووین و هیڤییا چاكبوونا ب له‌ز بۆ برینداران دخوازم و من وه‌زاره‌تا ساخله‌مییێ راسپارد كو هه‌مى هاریكارى و پشته‌ڤانییا پێدڤى پێشكێشبكه‌ن".

د به‌یانێ دا هاتیه‌ ژى "ل گۆره‌ى زانیاریێن ده‌ستپێكى ئه‌ڤ هێرش ژ ده‌ڤه‌ره‌كا نزیك ژ ناڤ ئاخا ئیراقێ دهێنه‌ ئه‌نجامدان، داخوازێ ژ حكومه‌تا فیدرالى دكه‌م ب شێوه‌یه‌كێ جدى لێكۆلینێ بكه‌ت و لێپرسینێ ل گه‌ل ئه‌نجامده‌ران بكه‌ت، چاڤه‌رێى رێكارێن ب له‌ز ژ به‌غدا دكه‌ین و پێدڤییه‌ گرۆپێن چه‌كدار یێن نه‌یاسایى كونترۆل بكه‌ت و ئه‌م به‌رهه‌ڤین هه‌ماهه‌نگییێ ل گه‌ل به‌غدا بكه‌ین دا كو سنووره‌ك بۆ ڤان هێرشان بهێته‌ دانان".