گاڤ

د چارچووڤێ سەرەدانا خۆ یا بەغدا دا، ئەڤرۆ سەرۆک نێچیرڤان بارزانی ل گەل قاسم ئەعرەجی، شیرەتکارێ ئاسایشا نشتیمانی یا ئیراقێ کۆمبوو و بابەتێن گرێدایی ئیراق و هەرێما کوردستانێ بەحسکرن.

ل گۆرەی بەیانەکا سەرۆکاتییا هەرێما کوردستانێ، د کۆمبوونێ دا رەوشا ئەمنی یا ئیراقێ و مەترسی و گەفێن تیرۆرێ و ئالۆزییێن ژ ئەنجامێ شەرێن دەڤەرێ بەرهنگاری ئیراقێ بووین، بەحسکرن.

هەردو ئالییان دوپاتی ل گرنگییا هاریکاری و هەماهەنگییا د ناڤبەرا ئالییێن پەیوەندیدار یێن حکومەتا ئیراق و حکومەتا هەرێما کوردستانێ د وارێن ئەمنی دا بۆ بەرهنگاربوونا مەترسییێن ئەمنی کر، هەروەسا هەڤبوچوون بوون ل سەر پێدڤییا هاریکارییا هەمی ئالییان بۆ پارستنا ئارامی و سەقامگیرییا وەلاتی.

سەرۆکێ هەرێما کوردستانێ سوپاسییا ئەرک و رۆلێ شیرەتکارێ ئاسایشا نشتیمانی و تیما وان بۆ هەماهەنگی و هاریکارییان ل گەل ئالییێن پەیوەندیدار ل ئیراق و هەرێما کوردستانێ و ئەو خزمەتا د وارێ ئەمنی و پاراستنا سەقامگیرییێ دا دکەن.

ژ ئالییێ خۆ ڤە ژی ئەعرەجی دوپاتکر کو ئارامی و ئاسایش و سەقامگیرییا هەرێما کوردستانێ و هەمی دەڤەرێن ئیراقێ پێکڤە یا گرێدایە و پەسنا رۆلێ نشتیمانی یێ سەرۆک نێچیرڤان بارزانی کر ژبۆ لێکنێزیککرنا ئالییان و بزاڤێن وی بۆ چارەکرنا کێشەیان.