گاڤ

لێكۆلینه‌كا ساخله‌مییێ یا نوى ئاشكرا كریه‌؛ برێڤه‌چوونا ل سه‌ر ده‌رچكان مه‌ترسییا مرنێ ب هه‌ر ئه‌گه‌ره‌كێ بیت ب رێژه‌یا 24% كێم دكه‌ت هه‌روه‌سا مه‌ترسییا تووشبوونێ ب نه‌خۆشییێن دلى و بۆریێن خوینێ ب رێژه‌یا 39% كێم دكه‌ت.

ل گۆره‌ى لێكۆلینه‌كا نوى؛ هاتنوچوون ب رێكا ده‌ره‌چكان باشتره‌ ژ ب رێكا ئه‌سانسۆرێ، هه‌روه‌سا ئاماژه‌ ب وێ چه‌ندێ كریه‌ "هاتنوچوونا ل سه‌ر ده‌ره‌چكان مه‌ترسییا تووشبوونێ ب نه‌خۆشییێن دلى و بۆرییێن خوینێ ژ وان ژى جه‌لته‌یێن دلى، سستبوونا دلى و جه‌لته‌یا مێشكى ب رێژه‌یا 39% د ماوه‌یێ 14 سالان دا كێم دكه‌ت".

رۆژنامه‌یا ده‌یلى مه‌یل به‌لاڤكریه‌ "لێكۆلینێ ئه‌نالیزه‌كا مه‌زن بۆ نه‌هـ لێكۆلینێن به‌رى نوكه‌ و نزیكى 500 هزار كه‌سێن ته‌مه‌نێ وان دناڤبه‌را 35 تا 84 سالان دا كریه‌".

د لێكۆلینێ دا ئاشكرا بوویه‌ "ب هه‌ڤبه‌ركرن ل گه‌ل برێڤه‌نه‌چوونا ل سه‌ر ده‌ره‌چكان، برێڤه‌چوونا ل سه‌ر ده‌ره‌چكان دبیته‌ ئه‌گه‌رێ كێمبوونا مه‌ترسییا مرنێ ب هه‌ر ئه‌گه‌ره‌كێ ب رێژه‌یا 24% و كێمبوونا مه‌ترسییا تووشبوونێ ب نه‌خۆشییێن دلى و بۆریێن خوینێ ب رێژه‌یا 39%".

نوشدار سۆفى پادۆك ژ زانكۆیا ئیست ئه‌نگلیا دبێژیت "ئه‌گه‌ر ته‌ هه‌ردو ئوپشنێن برێڤه‌چوونا ل سه‌ر ده‌ره‌چكان یان ژى بكارئینانا ئه‌سانسۆرێ هه‌بن، برێڤه‌چوونا ل سه‌ر ده‌ره‌چكان بهه‌لبژێره‌ چونكى ئه‌و دێ هاریكارییا دلێ ته‌ كه‌ت".

زێده‌تر ژى گۆت "لێكۆلینا مه‌ دیار دكه‌ت؛ هندى ژماره‌یا ده‌ره‌چكان پتر بیت مفا پترن، لێ ئه‌ڤ چه‌نده‌ پێدڤى ب پشتراستكرنێ یه‌، ژ به‌ر ڤێ چه‌ندێ، ل هه‌ر جهه‌كێ بیت چ ل كارى یان ل مالێ ده‌ره‌چكان بكاربینه‌".