گاڤ

كۆمپانییا دانه‌گاز راگه‌هاند، سلامه‌تی و ساخله‌مییا كارمه‌ند و كرێكاران ژ كارێن هه‌ره‌ پێشیێ یێن كۆمپانیێ یه‌، ژبه‌ر ڤێ یه‌كێ ب شێوه‌یه‌كى ده‌مكى به‌رهه‌مئینان هاتیه‌ راگرتن و گوهۆڕین د شێوازێ ب رێڤه‌برنا كار دا هاتینه‌ كرن.

د راگه‌هاندنه‌كێ دا ئه‌ڤرۆ دوشه‌مبێ 29-4-2024ێ كۆمپانییا دانه‌گاز دبێژیت: سلامه‌تى و ساخله‌مییا كارمه‌ند و كرێكاران ژ كارێن پێشیێ یێن كۆمپانیێ یه‌ و ژبه‌ر ڤێ یه‌كێ ژى ب شێوه‌یه‌كێ ده‌مكى به‌رهه‌مئینانا گازێ ل وه‌ستگه‌ها كۆرمۆر هاتییه‌ راگرتن و گوهۆڕین ژى د شێوازێ برێڤه‌برنا كارى دا هاتینه‌ كرن.

ده‌مژمێر 6:45 خۆله‌كى پشتى نیڤرۆیا رۆژا 26ى ڤێ مه‌هێ كۆگه‌هه‌‌كا گازا كۆندێنسه‌یت ب رێكا هێرشه‌كا درۆنى بوو ئارمانج، ژ ئه‌نجامێ هێرشێ 4 كارمه‌ندان ژیانا خۆ ژ ده‌ست دا و 8 كه‌س ب سڤكى بریندار بوون.

هه‌روه‌سا دیاركریه‌، ل گه‌ل حكومه‌تا هه‌رێما كوردستانێ و حكومه‌تا ئیراقێ ل سه‌ر ئاسته‌كێ بلند د دانوستاندنان دانه‌ و هه‌روه‌سا ل گه‌ل ده‌ستهه‌لاتدارێن حكومه‌تێ د په‌یوه‌ندییان دانه‌ بۆ وێ یه‌كێ رێكارێن ئێمناهیێ توند تر بكه‌ن.