ئایدن مه‌عرووف: بزاڤ دهێنه كرن كورسییێن كۆتا یێن پێكهاته‌یان بزڤڕنه‌ڤه
بەلاڤ بکە
گاڤ
وه‌زیرێ هه‌رێمێ بۆ كاروبارێن پێكهاته‌یان راگه‌هاند؛ بزاڤ هه‌نه كورسییێن كۆتا یێن پێكهاته‌یان د په‌رله‌مانێ كوردستانێ دا دوباره بۆ نوینه‌رێن پێكهاته‌یان بهێنه زڤڕاندن.
ئایدن مه‌عرووف ئه‌ڤرۆ دوشه‌مبییێ راگه‌هاند "سیسته‌مێ كۆتا یێ پێكهاته‌یان ب یاسا هاتیه رێكخستن و بزاڤ هه‌نه كورسیێن كۆتا دوباره بۆ نوینه‌رێن پێكهاته‌یان ڤه‌گه‌ڕن".
دیار ژى كر "سه‌رۆك بارزانى پشته‌ڤانییه‌كا مه‌زن بۆ ماف و داخوازیێن پێكهاته‌یان ل هه‌رێما كوردستانێ هه‌یه".
دادگه‌ها فیدرالى یا ئیراقێ ل رۆژا 21ى شوباتا ئه‌ڤ ساله بڕیارا هه‌لوه‌شاندنا 11 كورسیێن كۆتا د په‌رله‌مانێ كوردستانێ دا دابوو هه‌روه‌سا بڕیارا دابه‌شكرنا هه‌رێما كوردستانێ ب سه‌ر چار بازنه‌یێن هه‌لبژارتنان دا دابوو.
ده‌ستهه‌لاتێن هه‌رێما كوردستانێ و ب تایبه‌ت پارتى دیمۆكراتى كوردستانێ ره‌خنه ل ڤێ بڕیارێ گرتن و نه‌رازیبوونا خۆ ل سه‌ر دیاركرن.
ل رۆژا 18ى ئادارێ، وه‌ك نه‌رازیبوون ل سه‌ر بڕیارێن دادگه‌ها فیدرالى، پارتى دیمۆكراتى كوردستان ب رێكا به‌یانه‌كا مه‌كته‌با سیاسى بایكۆتكرنا هه‌لبژارتنێن په‌رله‌مانێ كوردستانێ راگه‌هاند، هه‌روه‌سا ژماره‌یه‌كا لایه‌نێن دى یێن سیاسى یێن توركمانى و مه‌سیحى ژى هه‌مان بڕیار دان.
