گاڤ

لێكۆلینه‌كا ساخله‌مییێ یا بریتانى یا نوى به‌حسێ مفابێن ڤاكسینێن دژى كۆرۆنایێ كریه‌ و دیاركریه‌ كو ڤاكسین د لاوازكرنا ڤایرۆسێ كۆرۆنایێ دا د كارتێكه‌ر بوون.

لێكۆله‌رێن زانكۆیا ئوكسفۆرد لێكۆلینه‌ك ل سه‌ر وان كه‌سێن ڤاكسینێ كۆرۆنایێ وه‌رگرتین و یێن نه‌وه‌رگرتین كریه‌، ئارمانج ژ لێكۆلینێ ئه‌و بوو كا تا چ رادده‌ ئه‌و كه‌سێن ڤاكسین وه‌رگرتین ژ ڤایرۆسى د پاراستى بوون، وه‌كى مالپه‌رێ مێدیكال ئێكسپرێس ئاماژه‌پێكرى.

ئه‌نجامێن وێ لێكۆلینێ یا كو د كۆڤارا Nature Communications دا به‌لاڤبووى ئاشكرا كریه‌ كو ئه‌و كه‌سێن ڤاكسین وه‌رگرتین، تووشبوونا وان ب ڤایرۆسێ كۆرۆنایێ سڤكتر بوو ب هه‌ڤبه‌ركرن ل گه‌ل وان كه‌سێن ڤاكسین وه‌رنه‌گرتین.

پرۆفیسۆر دانیێل ئوكونۆر سه‌رۆكێ لێكۆلینێ دبێژیت "ئه‌ڤ لێكۆلینه‌ دوپاتییێ ل سه‌ر كاریگه‌رییا ڤاكسیندانانێ و رۆلێ وێ یێ سه‌ره‌كى د سنوورداركرنا كارتێكرنێن خراب یێن كۆڤید-19 دا دكه‌ت".

ڤایرۆسێ كۆرۆنایێ ل دویماهییا سالا 2019 به‌لاڤببوو و ل گۆره‌ى ئاماران؛ پتر ژ 7 ملیۆن كه‌سان ل سه‌رانسه‌رى جیهانێ تا نوكه‌ ب ڤایرۆسێ كۆرۆنایێ گیانێ خۆ ژده‌ستداینه‌.

پترییا حاله‌تێن گیانژده‌ستدانێ ژ به‌ر ڤایرۆسى به‌رى په‌یدابوونا ڤاكسینان بوون، كو هه‌ر ژ ده‌مێ ده‌ستپێكرنا ڤاكسیندانانێ ل دویماهییا سالا 2020 و ل دویڤ دا، رێژه‌یا مرنێ ژ ئه‌گه‌رێ كۆرۆنایێ ب شێوه‌یه‌كێ مه‌زن كێمبوویه‌.