رێككه‌فتنا هنارده‌كرنا گه‌نمێ ئۆكراينى بۆ ده‌مێ 120 رۆژێن دى هاته درێژكرن
بەلاڤ بکە
گاڤ نيوز
رێككه‌فتنا هنارده‌كرنا گه‌نمێ ئۆكراينى ب رێكا ده‌ريايا ره‌ش بۆ ده‌مێ 120 رۆژێن دى هاته درێژكرن.
ئولێكسانده‌ر كوبراكۆڤ وه‌زيرێ ژێرخانه‌يێ يێ ئۆكراينا د تويته‌كێ دا ئه‌ڤرۆ پێنجشه‌مبيێ راگه‌هاند؛ رێككه‌فتنا هنارده‌كرنا گه‌نم و دانه‌وێله‌يێن ئۆكراينى ب رێكا ده‌ريايا ره‌ش بۆ 120 رۆژێن دى هاته درێژكرن.
ئه‌نتونيۆ گوتيرێس ئه‌ميندارێ گشتى يێ نه‌ته‌وه‌يێن ئێكگرتى پێشوازى ل ڤێ گاڤێ كر و راگه‌هاند؛ نه‌ته‌وه‌يێن ئێكگرتى ب ته‌مامى يا پێگيره ب نه‌هێلانا ئاسته‌نگان د رێكا هنارده‌كرنا گه‌نمى دا.
ژ لايێ خۆڤه، ره‌جه‌ب ته‌يب ئه‌ردۆگان سه‌رۆككۆمارێ توركيا دياركر؛ رێككه‌فتنا هنارده‌كرنا گه‌نمێ ئۆكراينى بۆ 120 رۆژان هه‌ر ژ رۆژا 19ى چريا دوێ هاته درێژكرن.
ئه‌ردۆگان ئاشكرا ژى كر؛ د چار هه‌يڤێن بۆرى دا پتر ژ 11 مليۆن ته‌نێن گه‌نم و دانه‌وێله‌يێن ئۆكراينى ب رێكا 500 كه‌شتيان هاتينه هنارده‌كرن و گه‌هشتينه كه‌سێن پێدڤى.
ئۆكراينا ب ئێك ژ مه‌زنترين وه‌لاتێن هنارده‌كارێن گه‌نمى ل جيهانێ دهێته هژمارتن، لێ ده‌ستپێكرنا شه‌ڕێ رۆسيا بۆ سه‌ر ئۆكراينا ل 24ى شوباتا بۆرى ببوو ئه‌گه‌رێ رێگرتنێ ل هنارده‌كرنا 20 مليۆن ته‌نێن دانه‌وێله‌يان.
ئۆكراينا و رۆسيا ل 22ى تيرمه‌ها بۆرى ب چاڤدێريا نه‌ته‌وه‌يێن ئێكگرتى و توركيا رێككه‌فتنه‌ك ل سته‌نبۆلێ ژ بۆ دوباره ده‌ستپێكرنا هنارده‌كرنا گه‌نم و دانه‌وێله‌يێن ئۆكراينى ب رێكا سێ به‌نده‌رێن ده‌ريايا ره‌ش ئيمزاكربوون و ب رێكا وێ تا نوكه 11 مليۆن ته‌نێن گه‌نم و دانه‌وێله‌يێن ئۆكراينى هاتينه هنارده‌كرن.
