گاڤ

حكومه‌تا هه‌رێما كوردستانێ به‌رسڤا راپۆرتەکا سالانه‌ یا ئه‌مریكا بۆ مافێ مرۆڤى یا سالا 2022ێ دا و راگه‌هاند، بتنێ ل پارێزگه‌ها دهۆكێ ل سالا بۆرى 144 كه‌یسێن گه‌نده‌لیێ بۆ دادگه‌هێ هاتینه‌ رەوانەکرن.

نڤیسینگه‌ها رێكخستنا راسپارده‌یێن نێڤده‌وله‌تى یا حكومه‌تا هه‌رێما كوردستانێ به‌رسڤا راپۆرتا سالانه‌ یا وه‌زاره‌تا ده‌رڤه‌ یا ئه‌مریكا ل دۆر ره‌وشا مافێ مرۆڤى ل سالا 2022ێ ل هه‌رێما كوردستانێ دا و راگه‌هاند، راپۆرتا وه‌زاره‌تا ده‌رڤه‌ یا ئه‌مریكا گه‌له‌ك نه‌شه‌فافانه‌ ل سه‌ر راستى و نەواقعیانه‌ هه‌لسه‌نگاندنا ره‌وشا ئه‌ڤرۆ یا هه‌رێما  كوردستانێ كریه‌ و دوورووى و ئزدیواجیه‌ت تێدایه‌.

هه‌روه‌سا دیاركریه‌، وه‌ك پێدڤى ژى ئاماژه‌ ب پێنگاڤێن حكومه‌تا هه‌رێما كوردستانی نه‌كرینه‌ ب تایبه‌ت د به‌رهنگاربوونا تیرۆرێ دا و ئه‌و ته‌حه‌دیێن مه‌زن یێن هه‌رێما كوردستانێ تووش دبیتێ.

ئاشكراكریه‌، بتنێ ل پارێزگه‌ها دهۆكێ ل سالا 2022ێ ل پارێزگه‌ها دهۆكێ 144 كه‌یسێن گه‌نده‌لیێ بۆ دادگه‌هێ هاتینه‌ ئیحاله‌كرن.

هه‌روه‌سا خویاكریه‌، حكومه‌تا هه‌رێمێ ب شێوه‌یه‌كێ كارا دانوستاندن و لێكتێگه‌هشتن ل گه‌ل كۆمه‌لگه‌ها نێڤده‌وله‌تى درێژیپێده‌ر و پابه‌نده‌ ب كاركرن ل گه‌ل هه‌ڤپشكێن خۆ بۆ پشتراستبوون ژ بهایێن دیمۆكراسى، مافێ مرۆڤى و گه‌شه‌كرنا ئابۆرى.

نڤیسینگه‌ها به‌رسڤدانا راپۆرتێن نێڤده‌وله‌تى ئاشكراكریه‌، ل رۆژێن بهێت دێ ب تێر و ته‌سه‌لى به‌رسڤا راپۆرتا وه‌زاره‌تا ده‌رڤه‌ یا ئه‌مریكا ده‌ن.