جون كێربى: ئه‌مریكا رژده لسه‌ر مانا هێزێن خۆ ل سووریێ
بەلاڤ بکە
گاڤ
جڤاتا ئاسایشا نیشتیمانى یا كوچكا سپى یا ئه‌مریكى راگه‌هاند، هێزێن ئه‌مریكا دێ ل سووریێ مینن و ئه‌مریكا ب ده‌نگه‌كێ بلند به‌رانبه‌رێن خۆ ئاگه‌هداركرینه.
جون كێربى، رێڤه‌به‌رێ په‌یوه‌ندیێن ستراتیژى یێن جڤاتا ئاسایشا نیشتیمانى یا كوچكا سپى یا ئه‌مریكى ل دۆر مانا هێزێن وه‌لاتێ خۆ ل سووریێ و رۆژئاڤایێ كوردستانێ دا زانین، سه‌رۆك جو بایدن رژده لسه‌ر مانا هێزێن ئه‌مریكى ل سووریێ و وێر‌ه‌كانه ژى به‌رسڤا هێرشێن سه‌ر سازێن سه‌ربازیێن ئه‌مریكى ل سووریێ دایه.
كێربى دا زانین ژى، ئه‌گه‌ر بایدن ب پێتڤى بزانیت، دێ پتر به‌رسڤا وان هێرشان ده‌ت یێن ژلایێ ئیرانێ ڤه دهێنه پشته‌ڤانیكرن و بۆ سه‌ر هێزێن وان ل سووریێ و ئیراقێ.
رێڤه‌به‌رێ په‌یوه‌ندیێن ستراتیژى یێن جڤاتا ئاسایشا نیشتیمانى یا كوچكا سپى یا ئه‌مریكى دا زانین ژى، نها نێزیكى هزار سه‌ربازێن ئه‌مریكى ل سووریێ هه‌نه و ب ره‌نگه‌كێ كاریگه‌ر روى ب روى رێكخستیا تیرۆرستیا داعشێ دبن.
گۆت ژى همبه‌ر هێرشێن ڤێ هه‌فتیێ بۆ سه‌ر سازیێن سه‌ربازى یێن ئه‌مریكى ل سووریێ وان نیشاندا كو ب پێداگرى دێ گه‌لێ ئه‌مریكا پارێزن و ب ده‌نگه‌كێ بلند په‌یاما خۆ گه‌هانده ئالیێن به‌رانبه‌ر.
