راگه‌هاندنه‌ك ژ نڤیسینگه‌ها سه‌رۆكێ حكومه‌تا هه‌رێمێ
بەلاڤ بکە
گاڤ
نڤیسینگه‌ها سه‌رۆكێ حكومه‌تا هه‌رێما كوردستانێ ئه‌ڤرۆ چارشه‌مبیێ راگه‌هاندنه‌ك به‌لاڤكر و تێدا ئاماژه دا بابه‌تێ مووچه‌یان ل سلێمانیێ.
د راگه‌هاندنه‌كا نڤیسینگه‌ها مه‌سرور بارزانى سه‌رۆكێ حكومه‌تێ دا هاتیه؛ ده‌مه‌كه داموده‌زگه‌هێن میدیایى و كه‌سێن نزیك ژ قوباد تاله‌بانى جێگرێ سه‌رۆكێ حكومه‌تێ پرۆپاگه‌نده‌یا وێ چه‌ندێ دكه‌ن كو وه‌ك هه‌لویسته‌كێ ل هه‌مبه‌ر مافێ مووچه‌خۆرێن سلێمانیێ وان بایكۆتا كۆمبوونێن جڤاتا وه‌زیران كریه، ئه‌م بۆ رایا گشتى رۆن دكه‌ین كو ئه‌ڤه سته‌مه‌كا دى یه ل خه‌لكێ سلێمانیێ، هه‌له‌بجه، راپه‌رین و گه‌رمیان دهێته كرن.
د راگه‌هاندنێ دا هاتیه "به‌رگریكرن ژ مافێ مووچه‌خۆرێن سلێمانیێ ئه‌ركێ هه‌مى تیمێن وه‌زارى یه و ئه‌گه‌ر سته‌مه‌ك به‌رانبه‌ر خه‌لكێ سلێمانیێ هه‌بیت، ژ به‌رى هه‌ر كه‌سه‌كى وه‌زیرێن پارتى و گۆڕان و سوشیالست ژى قه‌بویل ناكه‌ن، له‌وا بلا موزایه‌ده ل سه‌ر خه‌لكێ سلێمانیێ نه‌هێنه كرن".
دیار ژى كریه "كێشه‌یا نه‌هێلانا سیوله‌یێ چه‌ندین هه‌یڤ بوون ل سنوورێ سلێمانیێ هه‌بوو و لژنه‌یا دویڤچوونێ ژى هاتبوو پێكئینان و كار ل سه‌ر وێ كێشه‌یێ دكر و بڕیار بوو كۆمبوونه‌كا تایبه‌ت ل سه‌ر ئه‌نجامێن كارێ وێ لژنه‌یێ بهێته كرن، لێ كارێ تیرۆركرنا هاوكار جاف رویدا و ئه‌و پرۆسێسه په‌كخست، چونكى ئێكسه‌ر پشتى داخوازیا راده‌ستكرنا تۆمه‌تبارێن وى كارى، قوباد تاله‌بانى و تیما وه‌زارى یا ئێكه‌تیێ هه‌لویست وه‌رگرتن و ژ كۆمبوونێن جڤاتا وه‌زیران خۆڤه‌كێشان".
راگه‌هاندنێ زێده ژى كریه: هه‌رێما كوردستانێ د ره‌وشه‌كا سه‌خت یا ئابوورى دا دبۆریت، لێ ئه‌و تشتێ ره‌وشا دارایى یا سلێمانیێ سه‌ختتر كرى ده‌ستبرنه بۆ داهاتێ ناڤخۆ یێ وێ ده‌ڤه‌رێ، كو هه‌ر قوباد و كه‌سێن دى دناڤ وێ حزبێ دا ژێ به‌رپرسیارن.
خۆیا ژى كریه؛ باشتركرنا ره‌وشێ ب تنێ پێدڤى ب جێگیركرنا سیسته‌مه‌كێ دارایى یێ ب هێز هه‌یه، ئه‌و ژى كو حكومه‌ت چاڤدێریه‌كا هویر ل سه‌ر پرۆسێسا كۆمكرنا هه‌مى داهاتان بكه‌ت و پاشى ئه‌و داهاته ب شێوه‌یه‌كێ دادپه‌روه‌رانه بچیته د خزمه‌تا وه‌لاتیان دا.
ئاماژه دایه وێ چه‌ندێ ژى كو "كێشه‌یا دارایى ل سنوورێ سلێمانیێ ژ به‌ر وێ چه‌ندێ یه چونكى پرۆسێسا كۆمكرنا داهاتی یا شه‌فاف نینه و رێك ناهێته دان كو چاڤدێریه‌كا ناڤه‌ندى ل سه‌ر وێ پرۆسێسێ هه‌بیت".
زێده ژى كریه "جهێ چاره‌كرنا ڤان هه‌مى كێشه‌یان ب تنێ كۆمبوونێن جڤاتا وه‌زیرانه، له‌وا ئه‌گه‌ر قوباد تاله‌بانى و تیما وى هه‌ست ب به‌رپرسیاریێ به‌رانبه‌ر خه‌لكێ سلێمانیێ بكه‌ن، بلا ده‌ست ژ چه‌واشه‌كاریان به‌رده‌ن و بۆ كۆمبوونان ڤه‌گه‌ڕن و دانوستاندنه‌كا ئاڤاكه‌ر بكه‌ن".
