ئه‌مريكا: د پشته‌ڤانيا هه‌رێما كوردستانێ و پێشمه‌رگه‌ى دا دێ به‌رده‌وام بين
بەلاڤ بکە
گاڤ
شانده‌كێ ئه‌مريكى پشته‌ڤانيا خۆ بۆ هه‌رێما كوردستانێ و هێزێن پێشمه‌رگه‌ى دوپاتكر و ئاماژه دا گرنگيا بجهئينانا ياداشتنامه‌يا لێكتێگه‌هشتنێ دناڤبه‌را وه‌زاره‌تا به‌رگريێ يا ئه‌مريكا و وه‌زاره‌تا پێشمه‌رگه‌ى دا.
مه‌سرور بارزانى سه‌رۆكێ حكومه‌تێ ئه‌ڤرۆ چارشه‌مبيێ پێشوازى ل شانده‌كێ ئه‌مريكى ب سه‌رۆكاتيا دانا سترۆل جێگرا هاريكارێ وه‌زيرێ به‌ره‌ڤانيێ يێ ئه‌مريكا بۆ كاروبارێن رۆژهه‌لاتا ناڤه‌راست ب به‌رهه‌ڤبوونا جه‌نه‌رال ماتيۆ ماكفه‌رلين فه‌رمانده‌يێ گشتى يێ هێزێن هه‌ڤپه‌يمانان ل ئيراقێ و سووريا كر.
ل گۆره‌ى راگه‌هاندنه‌كا سه‌رۆكاتيا حكومه‌تێ؛ دانا سترۆل پشته‌ڤانيا ئه‌مريكا بۆ هه‌رێما كوردستانێ و هێزێن پێشمه‌رگه‌ى دوپاتكر هه‌روه‌سا د كۆمبوونه‌كێ دا به‌حس ل چاكسازيێن وه‌زاره‌تا پێشمه‌رگه‌ى و رێكارێن بجهئينانا ياداشتنامه‌يا لێكتێگه‌هشتنێ دناڤبه‌را وه‌زاره‌تا پێشمه‌رگه‌ى و وه‌زاره‌تا به‌رگريا ئه‌مريكا دا هاته كرن.
هه‌روه‌سا جێگرا هاريكارێ وه‌زيرێ به‌رگريێ يێ ئه‌مريكا دياركر كو "ئه‌مريكا دێ د پشته‌ڤانيا هێزێن پێشمه‌رگه‌ى دا بۆ رويبرويبوونا گه‌فێن تيرۆرێ و رێكخراوا تيرۆرستى يا داعش به‌رده‌وام بيت".
ژ لايێ خۆڤه سه‌رۆكێ حكومه‌تا هه‌رێمێ سوپاسيا پشته‌ڤانيا ئه‌مريكا كر و حه‌زا هه‌رێما كوردستانێ بۆ پێشڤه‌برنا په‌يوه‌نديان ل گه‌ل ئه‌مريكا دوپاتكر.
ره‌وشا ده‌ڤه‌رێن كوردستانى يێن ده‌رڤه‌ى ئيداره‌يا هه‌رێمێ و ب دويماهيك ئينانا داگيركرنا ئه‌ردێن جۆتياريێن كورد و توركمان ل سنوورێ كه‌ركووكێ ژ ته‌وه‌رێن دى يێن كۆمبوونێ بوون.
