گاڤ

ویلایه‌تێن ئێكگرتى یێن ئه‌مریكى سوپاسیا سه‌رۆك نێچیرڤان بارزانى ژ به‌ر بزاڤێن وى بۆ ئێكگرتنا هێزێن پێشمه‌رگه‌ى و چاكسازیێ د وه‌زاره‌تا پێشمه‌رگه‌ى دا كر.
سه‌رۆك نێچیرڤان بارزانى ئه‌ڤرۆ چارشه‌مبیێ پێشوازى ل شانده‌كێ بلند یێ ئه‌مریكى ب سه‌رۆكاتیا دانا سترۆل جێگرا هاریكارێ وه‌زیرێ به‌رگریێ یێ ئه‌مریكا ب به‌رهه‌ڤبوونا جه‌نه‌رال ماكفارلان فه‌رمانده‌یێ هێزێن هه‌ڤپه‌یمانان ل ئیراقێ و سووریا و ژماره‌یه‌كا دپلۆماتكاران كر.
سه‌رۆكاتیا هه‌رێما كوردستانێ به‌لاڤكریه‌؛ د كۆمبوونه‌كێ دا دناڤبه‌را سه‌رۆكێ هه‌رێمێ و شاندێ ئه‌مریكى دا، په‌یوه‌ندیێن هه‌رێما كوردستانێ و ئیراقێ ل گه‌ل ئه‌مریكا، په‌یوه‌ندیێن هه‌ولێر و به‌غدا و دانوستاندنێن چاره‌كرنا كێشه‌یان، دویماهیك پێشهاتێن شه‌ڕێ دژى داعش، چاكسازیێن وه‌زاره‌تا پێشمه‌رگه‌ى و گاڤێن ئێكخستن و رێكخستنا هێزێن پێشمه‌رگه‌ى هاتنه‌ به‌حسكرن.
دیار ژى كریه‌؛ هه‌ردو لایه‌ن ل سه‌ر وێ چه‌ندێ د هه‌ڤڕا بوون كو هێشتا داعش ل ئیراقێ و سووریا گه‌فه‌ و ته‌كه‌زى ل سه‌ر هه‌ڤكاریا هه‌ڤپشك كرن، شاندێ ئه‌مریكى به‌رده‌وامیا پشته‌ڤانیێ بۆ ئیراقێ و هه‌رێما كوردستانێ دوپاتكر.
هه‌ردو لایان ته‌كه‌زى ل سه‌ر سه‌رخستنا پرۆسێسا چاكسازی و ئێكخستنا پێشمه‌رگه‌ى كر و شاندێ ئه‌مریكى سوپاسیا سه‌رۆك نێچیرڤان بارزانى ژ به‌ر بزاڤێن وى بۆ رێكخستن و ئێكخستنا هێزێن پێشمه‌رگه‌ى كر هه‌روه‌سا سلاڤ و رێزێن وه‌زیرێ به‌رگریێ یێ ئه‌مریكا گه‌هانده‌ سه‌رۆك نێچیرڤان بارزانى.