بایدن: ئهمریكا دهست ل گهل یاخیبوونا گرۆپێ ڤاگنهر نهبوو
گاڤ
سهرۆكێ ئهمریكا ئێكهم كۆمێنت ل سهر یاخیبوونا گرۆپێ ڤاگنهر ل رۆسیا دا و دیاركر كو ئهمریكا چ پهیوهندى ب وى كارى ڤه نهبوو.
جۆ بایدن ئهڤرۆ دوشهمبیێ راگههاند؛ ئهو كارێ ڤاگنهر كرى پشكهك بوو ژ شهڕهنیخهكا ناڤخۆیى ل رۆسیا و ئهمریكا چ پهیوهندى پێڤه نهبوو.
سهرۆكێ ئهمریكا گۆت ژى "ئهمریكا و ههڤپهیمانێن خۆ كار ل سهر وێ چهندێ دكر كو رێك ب پۆتینى نههێته دان بهرپرسیاریا ڤى كارى بێخیته د ستۆیێ رۆژئاڤاى دا، ههڤپهیمانیا ناتۆیێ چ دهست ل گهل لڤینا گرۆپێ ڤاگنهر نهبوو".
خۆیا ژى كر "هێشتا زوى یه ئهنجامێن دویماهیێ یێن لڤینێ و رهوشا رۆسیا بهێنه زانین، تیما من یا ئێمناهیا نهتهوهیى بهردهوام دویڤچوونا پێشهاتان دكهن".
بایدن ئهو چهنده ژى نهڤهشارت كو ئهمریكا دێ د پشتهڤانیا ئۆكراینا دا بهردهوام بیت دویر ژ رویدانێن ل رۆسیا چێدبن.
گرۆپێ ڤاگنهر پشتى چهند ناكۆكیان ل گهل وهزارهتا بهرگریێ یا رۆسیا ل رۆژا شهمبیا بۆرى چووبوو دناڤ باژێڕێ رۆستۆڤ ل باشوورێ رۆژئاڤایێ رۆسیا دا و پێشرهوى بهرهڤ ژمارهیهكا دهڤهرێن دى ژى دناڤبهرا رۆستۆڤ و موسكۆ دا كربوون ژ بهرى بڕیارا خۆڤهكێشانێ ل ههمان رۆژ پشتى نزیكى موسكۆ بووین بدهت پشتى ناڤبهینكاریا لوكاشینكۆى سهرۆكێ بیلارۆسیا.
سهرۆكێ ڤاگنهر د تۆمارهكا دهنگى دا ل ئهڤرۆ دیاركربوو كو وان ئهو لڤینه ئهنجامدا چونكى بڕیارا ههلوهشاندنا گرۆپى ل 1ى تیرمهها بهێت هاتبوو دان.