رۆژنامهیهكا ئسپانى نهێنییهكا سهرۆكێ یانهیا ریال مهدرید بهرى یارییا كلاسیكۆیێ ئاشكرا دكهت
گاڤ
رۆژنامهیهكا ئسپانى ئاشكرا كریه؛ سهرۆكێ یانهیا ریال مهدرید بهرى یارییا كلاسیكۆیا بۆرى ل گهل بهرشلۆنا ل تۆنێلا یاریگهها سانتیاگۆ بێرنابێیۆ سلاڤكربوو دادڤانێ یاریێ و هاریكارێن وى و دیاركریه كو چ جاران خوان لاپۆرتا یان سهرۆكێن بهرێ یێن بهرشلۆنا كارهكێ هۆسا نهكرینه.
ریال مهدرید د یارییا كلاسیكۆیێ دا ل ئێكشهمبییا بۆرى ب ئهنجامێ 3-2 سهركهفتن ل سهر بهرشلۆنا تۆماركربوو و ب ڤێ چهندێ ژ بدهستڤهئینانا ناسناڤێ لالیگایێ نزیكبوویه.
د یاریێ دا، دادڤانى گۆلهكا لامین یامال یاریكهرێ بهرشلۆنا نههژمارتبوو ب بههانهیا وێ چهندێ كو تهپهیێ ب تهمامى هێلا گۆلا ریال مهدرید دهرباز نهكربوو، یانهیا بهرشلۆنا نهرازیبوونا خۆ ل سهر ڤێ چهندێ دیاركربوو كو داخوازا بدهستڤهئینانا راپۆرتێن تایبهت ب یاریێ ژ بۆ داخوازكرنا دوبارهكرنا یاریێ كربوو.
رۆژنامهیا موندۆ دێپورتیڤۆ ئهڤرۆ چارشهمبیێ راپۆرتهك ل بن ناڤێ ’گهلهكا نهێنییه’ بهلاڤكریه و تێدا هاتیه "تشتێ بوویه جهێ تێبینیكرنێ بۆ یاریكهرێن بهرشلۆنا و راهێنهران بهرى كلاسیكۆیێ، ههبوونا فلورێنتیۆ پێرێز سهرۆكێ ریال مهدرید ل تۆنێلا یاریگههێ بهرى یاریێ دهمێ ڤیاى پشتهڤانییا یاریكهرێن خۆ بكهت، لێ بێرێز نه ب تنێ سلاڤكره یاریكهرێن خۆ و ئهنچێلۆتى، بهلكو كارلۆس مێخیا داڤیلا ژى ل گهل وى بوو كو دادڤانێ خۆلا ئێكێ یا ئسپانیا بوو دناڤبهرا سالێن 1995 و 2009 دا پشتى ب دویماهیك هاتنا كاروانێ وى یێ دادڤانیێ، ههر ژ سالا 2009 تا نوكه شیرهتكارێ دادڤانیێ یێ ریال مهدریده".
وێ رۆژنامهیێ ئاشكرا ژى كریه "ههروهسا سهرۆكێ ریال مهدرید سلاڤكربوو سیزار سوتۆ گرادۆ دادڤانێ كلاسیكۆیێ و هاریكارێن وى".
ئاماژه ب وێ چهندێ ژى كریه "دیدارا دناڤبهرا فلورێنتینۆ پێرێز و سوتۆ گرادۆ نه ب تنێ سلاڤكرن بوو، بهلكو ب تنێ پشتى دو رۆژان ژ پهخشكرنا ڤیدیۆیهكا نوى د كهنالێ ریال مهدرید یێن تهلهڤزیۆنى دا هاتبوو كو رهخنه ل وى دادڤانى گرتبوو، وى دادڤانى ژى ژ لایێ خۆڤه بێدهنگى ههلبژارتبوو سهرهراى وێ چهندێ كو د ههیڤا كانوینا دوێ یا بۆرى دا داخۆیانییهكا وى بهلاڤببوو كو ریال مهدرید ب ڤان ڤیدیۆیان نهڤیانێ بهلاڤ دكهن، لێ ل گهل وێ چهندێ ئاماژه نهدابوو ناڤێ ریال مهدرید و گۆتبوو: ئهو كهنالهكێ تهلهڤزیۆنى یه ڤێ چهندێ دكهت و ئهو بهحسێ یانهیهكێ ناكهین".
دیار ژى كریه "تۆرهبوونهكا مهزن دناڤ بهرشلۆنا دا ژ بهر دادڤانیێ ههیه، یانه د وێ هزرێ دابیه هندى ریال مهدرید پتر رهخنهیێ ل دادڤانان بگریت، دادڤان پتر خۆ ب دهست ریال مهرید ڤه بهرددهن و توندتر دبن ل گهل بهرشلۆنا، ژ بهر ڤێ چهندێ،ج هێ سهرسۆرمانێ بوو كو سهرۆكێ ریال مهدرید ل تۆنێلا گوهۆڕینا جلوبهرگان بوو ئێكسهر ژ بهر یارییا كلاسیكۆیێ یا ئێكلاكهر د خۆلێ دا، ئهڤ چهنده ههڤدهم ل گهل فشارا ب هێز ژ لایێ كهنالێ ریال مهدرید ڤه ل سهر دادڤانان كو لاپۆرتا و سهرۆكێن بهرێ یێن بهرشلۆنا چ جاران كارهكێ هۆسا نهكرینه".
ریال مهدرید د نوكه دا ل سهرێ رێزبهندییا خۆلا ئسپانیا ب كۆمكرنا 81 خالان دهێت و ژ بدهستڤهئینانا خۆلا ئسپانیا نزیكبوویه، ل دهمهكێ بهرشلۆنا ب كۆمكرنا 70 خالان ل رێزا دوێ دهێت.