گاڤ

هه‌لبژارتییێ ئیراقێ یێ ئولۆمپى ده‌رباز بوو قاره‌مانییا ته‌پاپێى د خۆلا یارییێن ئولۆمپى یێن پاریس یێن ئه‌ڤ ساله‌ 2024 دا پشتى پله‌یا سیێ ل سه‌ر ئاستێ ئاسیا بده‌ستڤه‌ئیناى.

هه‌لبژارتییێ ئیراقێ پلێتا سیێ ژ كیشوه‌رێ ئاسیا بده‌ستڤه‌ئینا پشتى سه‌ركه‌فتن ل سه‌ر ئیندۆنیسیا ب ئه‌نجامێ 2-1 د یارییا ده‌ستنیشانكرنا پله‌یێن سیێ و چارێ ژ جاما ئاسیا یا هه‌لبژارتیێن ئولۆمپى – د بن 23 سالییێ دا – ل قه‌ته‌رێ تۆماركرى و ب ڤێ چه‌ندێ ل گه‌ل ژاپۆن و ئوزباكستانێ ژ كیشوه‌رێ ئاسیا ده‌رباز بوو ئولۆمپیادێن پاریس، ل ده‌مه‌كێ هه‌لبژارتییێ ئیندۆنیسیا دێ یارییا پاشكۆ ل گه‌ل تیما چارێ ژ كیشوه‌رێ ئه‌فریكا كو هه‌لبژارتییێ غینیا یه‌ پشتى حه‌فتییه‌كا دى ل پاریس ئه‌نجامده‌ت و سه‌ركه‌فتییێ وان دێ ده‌رباز بیته‌ یاریێن ئولۆمپى یێن پاریس.

د یارییا ئه‌ڤ شه‌ڤه‌ دا، ئیندۆنیسیا ل خۆله‌كا 19 گۆلا پێشكه‌فتنێ ب رێكا یاریكه‌رێ خۆ ئیڤار جێنه‌ر تۆماركر، هه‌لبژارتییێ ئیراقێ ل خۆله‌كا 27 گۆلا وه‌كهه‌ڤییێ ب رێكا زه‌ید ته‌حسین تۆماركر و ل خۆله‌كا پێنجێ ژ نیڤا زێده‌كرى یا ئێكێ عه‌لى جاسم گۆلا سه‌ركه‌فتنێ بۆ ئیراقێ تۆماركر.

عه‌لى جاسم یاریكه‌رێ ئیراقێ د نوكه‌ دا ب چار گۆلان ل سه‌رێ لیستا گۆلكه‌رێن قاره‌مانییێ دهێت.

یاریێن ئولۆمپى یێن پاریس 2024 دێ ل هه‌یڤا تيرمه‌ها بهێت ده‌ستپێكه‌ن و تێدا هه‌لبژارتییێ ئیراقێ دێ ل رۆژا 24ى تیرمه‌هێ یارییا خۆ یا ئێكێ ل گه‌ل ئۆكراینا كه‌ت و د دویڤ دا دێ یارییێ ل گه‌ل هه‌ر ئێك ژ ئه‌رجه‌نتین و مه‌غریبێ كه‌ت.