سهرۆكێ دهستهیا لالیگایێ: ژ بهر ڤى ئهگهرى تهكنیكا هێلا گۆلێ د خۆلا ئسپانیا دا ناهێته بكارئینان
گاڤ
ل دهمهكێ تا نوكه بگروڤهكێش ل ئسپانیا ژ بهر بزاڤا گۆلكرنێ یا یامین لامال یاریكهرێ بهرشلۆنا د یارییا كلاسیكۆ دا ل گهل ریال مهدرید د بهردهوامن، سهرۆكێ دهستهیا خۆلا ئسپانیا ئاماژه دا ئهگهرێ سهرهكى یێ بكارنهئینانا تهكنیكا هێلا گۆلێ Goal-line Technology د خۆلا لالیگا یا ئسپانى دا.
ریال مهدرید د یارییا كلاسیكۆیێ دا ل ئێكشهمبییا بۆرى ب ئهنجامێ 3-2 سهركهفتن ل سهر بهرشلۆنا تۆماركربوو، د یاریێ دا، دادڤانى بزاڤهكا گۆلكرنێ یا لامین یامال یاریكهرێ بهرشلۆنا ب گۆل نههژمارتبوو ب بههانهیا وێ چهندێ كو تهپهیێ ب تهمامى هێلا گۆلا ریال مهدرید دهرباز نهكربوو و یانهیا بهرشلۆنا نهرازیبوونا خۆ ل سهر ڤێ چهندێ دیاركربوو.
ل گۆرهى سهرۆكێ دهستهیا خۆلا ئسپانیا یا تهپاپێى، تهكنیكا هێلا گۆلێ وى پارهى نائینیت یێ كو لێ دهێته مهزاختن.
رۆژنامهیا ماركا ئهڤرۆ چارشهمبییێ ژ خاڤیێر تێباس سهرۆكێ دهستهیا لالیگایێ ل دۆر گرتهیا لامین یامال و نهبوونا تهكنیكا هێلا گۆلێ د خۆلا ئسپانیا دا ڤهگوهاستییه "تهكنیكا هێلا گۆلێ نه تشتهكێ نموونهیى یه".
گۆت ژى "بهایێ دارایى یێ بكارئینانا تهكنیكا هێلا گۆلێ گهلهك یێ بلنده ب ههڤبهركرن ل گهل بكارئینانا رێكپێداى یا وێ".
دیار ژى كر "نهیا لوژیكى یه ئهم پێنج تا شهش ملیۆنان بۆ بكارئینانا تهكنیكا هێلا گۆلێ بۆ جارهكێ ب تنێ بمهزێخین و ل گهل ههبوونا گۆمانان، ل دهمهكێ VAR دشێت 99% یا حالهتان چاره بكهت".
ئاماژه ب وێ چهندێ ژى كر "ل جهێ تهكنیكا هێلا گۆلێ، د شیان دایه گهلهك كامیرهیان بۆ هاریكارییا دادڤانى بكاربینین".
ریال مهدرید د نوكه دا ل سهرێ رێزبهندییا خۆلا ئسپانیا ب كۆمكرنا 81 خالان دهێت و ژ بدهستڤهئینانا خۆلا ئسپانیا نزیكبوویه، ل دهمهكێ بهرشلۆنا ب كۆمكرنا 70 خالان ل رێزا دوێ دهێت.