رادیۆیهكا فرهنسى: سهرۆك نێچیرڤان بارزانى دوباره ههرێما كوردستانێ ب جیهانێ ڤه گرێدایه
گاڤ
مالپهرێ رادیۆیهكا فرهنسى ئاماژه دایه سهرهدانا سهرۆكێ ههرێما كوردستانێ بۆ فرهنسا ل ئهینیێ و دیاركریه كو سهرۆك نێچیرڤان بارزانى دوباره ههرێما كوردستانێ ب جیهانێ ڤه گرێدایه، ههروهسا بهحس ل پهیوهندیێن دیرۆكى دناڤبهرا ههرێما كوردستانێ و فرهنسا دا كریه.
رادیۆیا rfi دیاركریه "دهمێ كوردان ل سالا 2017 ریفراندۆما سهربخۆییێ ئهنجامداین، بهغدا قهدهغهیا هاتنوچوونا ئاسمانى ل سهر ههرێما كوردستانێ سهپاند بوو، سهرهدانا سهرۆك نێچیرڤان بارزانى كو ل وى دهمى سهرۆكێ حكومهتا ههرێمێ بوو ژ بۆ پاریسێ هاریكار بوو ژ بۆ دوباره گرێدانا ههرێما كوردستانێ ب جیهانێ ڤه".
دیار ژى كریه "ماكرۆنى ل ئهینیێ پێشوازى ل نێچیرڤان بارزانى سهرۆكێ ههرێما كوردستانێ كربوو، فرهنسا هێشتا هێز ل ئیراقێ ماینه بۆ شهڕێ دژى داعش".
راپۆرتێ خۆیا كریه "فرهنسا ههر ژ دهستپێكا سالێن نۆتان پشتهڤانیا ههرێما كوردستانێ كریه و پهیوهندیێن پاریس و ههولێرێ بۆ سهردهمێ دهستههلاتداریا فرانسوا میتران سهرۆكێ بهرێ یێ فرهنسا ڤهدگهڕن".
زێده ژى كریه "دانیێل میتران ههڤژینا فرانسوا میتران سهرۆكێ بهرێ یێ فرهنسا رۆلهكێ ئێكلاكهر د رازیكرنا حكومهتا فرهنسا دا بۆ دانانا دهڤهرا دژهفڕینێ ل سهر دهڤهرێن كوردى ل سالا 1991 ههبوو".
خۆیا ژى كریه "دانیێل میتران د وى دهمى دا سهرهدانا نزیكى دو ملیۆن ئاوارهیێن كورد كربوو یێن ژ بهر هێرشێن رژێما سهدامى بهرهڤ سنوورێن توركیا و ئیرانێ ڤه رهڤین، كوردان ناسناڤێ دهیكا كوردان دانابوو ل سهر دانیێل میترانێ ژ بهر پشتهڤانیا وێ بۆ كوردان".
راپۆرت دیار ژى دكهت "فرهنسا ژ وهلاتێن دهستپێكێ بوو یێن كۆنسۆلخانهیا خۆ ل ههولێرێ پشتى كهفتنا رژێما سهدامى ل سالا 2003 ڤهكرین، ههروهسا رۆلهكێ ئێكلاكهر د هاریكاریا كوردان دا ل ئیراقێ و سووریا د شهڕێ دژى داعش دا ههبوو، پاریس هاریكار بوویه بۆ ئهنجامدانا راهێنانان ب هزاران سهربازێن ئیراقى و پێشمهرگهیێن كوردستانێ پشتى داعش ژمارهیهكا دهڤهران ل ئیراقێ و سووریا كونترۆلكرین".
ئاماژه ب وێ چهندێ ژى كریه "هێزێن فرهنسى ل ههولێرێ د نوكه دا رۆلهكێ كارتێكهر د شهڕێ دژى داعش دا ههیه".
راپۆرتێ ههروهسا دوباره تویتهكا نێچیرڤان بارزانى ل سهر تۆڕا ئێكس بهلاڤكریه كو تێدا سهرۆكێ ههرێما كوردستانێ دیاركربوو "خۆشحالم ب دیدارا ل گهل ههڤالێ خۆ ماكرۆنى، مه بهحس ل بهێزكرنا پهیوهندیان دناڤبهرا ئیراقێ و ههرێما كوردستانێ و فرهنسا دا ههروهسا پێشهاتێن ل ئیراقێ و دهرڤهى وێ كریه، پهیوهندیێن دیرۆكى دناڤبهرا ههرێما كوردستانێ و فرهنسا دا د كویرن، ئهو بهلگهنه ل سهر پێگیریا مه یا ههڤپشك ب ئاشتیێ و سهقامگیریێ و گهشهپێدانێ"
راپۆرتێ ئاماژه دایه وێ چهندێ ژى كو "ههرێما كوردستانێ پهیوهندیێن ب هێز ل گهل ئیسرائیلێ ههنه".
ههر وێ راپۆرتێ ژ سهنتهرێ قودس یێ كاروبارێن دیرۆكى ڤهگوهاستیه "ههڤسۆزیا دناڤبهرا كوردان و ئیسرائیلێ دا ژ بۆ وێ چهندێ ڤهدگهڕیت كو ههردو د دهڤهرهكێ دا دژین كو دژمنێن وان لێ ههنه و وان ههردویان خهبات بۆ وهلاتێ خۆ كرینه".