گاڤ

نوشدارەکا ئیراقی کو ل وەلاتێ ئەلمانیا دژیت، دەرمانەک بۆ چارەسەریا نەخۆشیا پەنجەشێرا پیستی ئاشکرا کر و ل گۆرەی تێستێن ب وی دەرمانی هاتینە کرن، رێژەیا رزگاربوونێ ژ پەنجەشێرێ پشتی بکارئینانا وی دەرمانی نێزیکی 90٪ یە.

ئەسەن عەباس، نوشدارەکا دەرمانساز یا ب رەگەز ئیراقی یە، بۆ ئاژانسا شەفەق گۆت: دەما چەندین سالانە ئەو ل وەلاتێ ئەلمانیا کار ل سەر دیتنا چارەسەرەیێ بۆ نەخۆشیا پەنجەشێرا پیستی دکەت و ب گۆتنا وێ: وێ دەرمانەک ژ هنگڤینی و ژمارەکا دی یا ماددەیێن سرۆشتی و کیمیایی چێکریە، لێ ژبەر پاراستنا نهێنیا کارێ وێ بەری پەسەند ببیت، ئەو ناڤێن وان ماددەیان نوکە نابێژیت.

ئەسەن عەباس دبێژیت: پشتی دەنگڤەدانا هەبوونا دەرمانەکی بۆ چارەسەریا پەنجەشێرا پیستی، چەندین کۆمپانیێن دەرمانان کۆژمێن ئێکجار مەزن یێن پارەی بۆ وێ پێشنیاز کرینە داکو دەرمان ب ناڤێ ون کۆمپانیان بیت، لێ وێ ئەو یەک رەت کریە و دخوازیت دەرمان ب ناڤێ وێ بیت.

هەرچەندە تا نوکە ئەو دەرمانێ وێ دەرمانسازێ چێکری ب فەرمی نەهاتیە پەسەندکرن، لێ وەزارەتا ساخلەمیا ئەلمانیا ب رێکا لژنەیەکا تایبەتمەند یا نوشداران ئەو دەرمان ل سەر 32 تووشبوویێن پەنجەشێرا پیستی تێست کریە و 28 ژ وان ب تەمامی چارەسەربووینە کو رێژەیا سەرکەفتنێ ب سەر پەنجەشێرێ دا پشتی بکارئینانا وی دەرمانی دگەهیتە ٪87.5 و ئەڤە رێژەیەکا مەزنە بۆ رزگاربوونێ ژ جۆرەکی ژ جۆرێن پەنجەشێرێ.

ئەسەن عەباس رژدە کو پێدڤیە دەرمان ب ناڤێ وێ بیت و هەر دەما پەسەند بوو، ئەو دێ ب بهایەکێ گەلەک کێم دانیتە دەرمانخانەیان داکو تووشبوویێن پەنجەشێرا پیستی مفای ژێ ببینن.