ئیراق بۆ هاورده‌كرنا به‌رهه‌مێن توركى ل رێزا چارێ هات
بەلاڤ بکە
گاڤ
ئیراق بۆ هاورده‌كرنا به‌رهه‌م و كه‌لوپه‌لێن توركى د هه‌یڤا شوباتێ یا بۆرى دا ل رێزا چارێ د رێزبه‌ندییا وه‌لاتان دا هات.
ده‌سته‌یا ئاماران یا توركى ئه‌ڤرۆ ئێكشه‌مبیێ راگه‌هاند؛ د هه‌یڤا شوباتێ دا هنارده‌كرنا توركیا بۆ به‌رهه‌مان ب رێژه‌یا 13.6% زێده‌بوویه و هاورده‌كرن ب رێژه‌یا 9.2% كێمبوویه.
دیار ژى كریه "بۆ هاورده‌كرنا به‌رهه‌مێن توركى ئه‌لمانیا ل رێزا ئێكێ هات ب بهایێ ملیاره‌ك و 772 ملیۆن دۆلاران، ئه‌مریكا ل رێزا دوێ هات ب بهایێ ملیاره‌ك و 332 ملیۆن دۆلاران، ئیتالیا ل رێزا سیێ هات ب بهایێ ملیاره‌ك و 158 ملیۆن دۆلاران، ئیراق ل رێزا چارێ هات ب بهایێ ملیاره‌ك و 72 ملیۆن دۆلاران و بریتانیا ل رێزا پێنجێ هات ب بهایێ ملیاره‌ك و 66 ملیۆن دۆلاران".
ئاماژه ب وێ چه‌ندێ ژى كریه "هنارده‌كرنا به‌رهه‌مێن توركى بۆ ئیراقێ د هه‌یڤا شوباتێ یا بۆرى دا ب رێژه‌یا 47.3% زێده‌بوویه ب هه‌ڤبه‌ركرن ل گه‌ل هه‌مان ده‌م ژ سالا بۆرى".
ئیراق د هه‌یڤێن بۆرى دا پترییا جاران ل رێزێن دوێ و سیێ بۆ هاورده‌كرنا به‌رهه‌مێن توركى دهات، لێ ل هه‌یڤا شوباتێ بۆ رێزا چارێ پاشڤه‌چووبوو.
ئیراق پترییا كه‌لوپه‌ل و كه‌ره‌سته‌یێن خۆ ژ وه‌لاتێن جیران وه‌كى توركیا و ئیرانێ هاورده‌كه‌ت، هه‌روه‌سا رێژه‌یه‌كا به‌رهه‌مان ژ چینێ و وه‌لاتێن كه‌نداڤێ عه‌ره‌بى ژى هاورده دكه‌ت.
